¶Here after bygynneth the seconde partye of this present book. and declareth how therthe is deuyded and what partie she is enhabyted / Capitulo primo.
SYth that the erthe is so lytyl as ye haue herd here to fore deuysed lytyl maye we preyse the goodes therof vnto the regard of heuen. lasse than men do donge a∣yenst fin gold. or ayenst precyous stones / how wel that in thende that one and that other shal be of no walewe. but for somoche as we beyng in this world vs semeth that the erthe is moche grete we haue declared to you as wel the roūdenesse as the gretenes to our power & that shortly. syth we haue vnderstande how the erthe is rounde on alle partes as an apple. Neuertheles it is not enhabyted in all parties whiche is well knowen. of no people of the world / And it is not enhabyted but in one quarter only lyke as the philo∣sophers haue enserched / whiche put for to knowe it grete trauayll & estudye and therfore we shal deuyse it al abou¦te in foure parties / of whiche ye may take ensample by an apple / whiche shal be parted by the myddle in foure parties right of lengthe & of brede by the core / and pare a quarter. & stratche the parell for to se & vnderstōde the facion in playn erthe or in your hande /