Here begynneth a newe boke of medecynes intytulyd or callyd the Treasure of pore men whiche sheweth many dyuerse good medecines for dyuerse certayn dysseases as in the table of this present boke more playnly shall appere. The boke of medecines.
¶How thou shall knowe yf the brayne panne be broken.
¶If the flesshe be hole aboue take & shaue the heed there as ye sore is / & dowble a lynynge clothe & sprede on it the whyte of an egge & bynde it to a nyght / & on the morow take it slyly away / & loke yf the cloute be moyst or dry / for yf it be moyst the panne is broken / & in the same place kerue the flesshe & let ye blode out & anoynt it with an oyntment made therfore / & thus shall thou saue hym / or els he is but deed.
