Caplm .lviij.
DIues. wherto sholde we pray to god for ony thynge / for he is not chaūgeable / & he may nought gyue vs but he wyste it well byfore the begynnynge of the worlde what he sholde gyue vs. ¶Pauper. We do not praye for to chaūge his en¦deles ordenaūce / but for to gette to vs by prayer that he hath ordeyned with¦out ende to graunte it vs by prayers. For sythen he is our lorde / & we may nought do / ne nothyng haue without hym therfore he wyll that we praye to hym as to our lorde / & in our prayers knowlechyng hym our lorde. And he wyll not graūte vs many thynges yt vs nedeth but we praye hym therfore ¶Diues. Why praye we to god with our mouth sythen he knoweth all our thoughtes / all our desyre / all our wyll & all what vs nedeth. ¶Pauper. For as I sayd fyrste / god wyll yt we know leche hym for our lorde / & knowleche our nede yt we may nothyng do / ne no¦thyng haue without hym / the whiche knowlechyng muste be done with the mouth. For saynt Poule sayth. Yf a man or woman wyl be saued / he must haue right byleue in herte inwarde & knowleche it outwarde with his mou¦the. Ro .x. Corde em̄ credi•• ad iusticiā¦ore aūt cōfessio fit ad salutē. More o∣uer my frendes ye shall vnderstande that ther is two maner of prayers / one is comon / an other is synguler. Comon prayer is the prayers of the mynystres of holy chirche and of co∣mon persones in holy chirche / whiche prayers they make in the name of al the people. And this maner of prayer muste be done by mouth / that the peo¦ple may knowe that they praye for them. And therfore it is ordeyned by the lawe that suche prayers sholde be sayd / and somtyme songe openly with an hyghe voyce that the people may here it. But synguler prayer that is done but of one synguler persone / it may be done with herte allone with∣out voyce of the mouth. Neuertheles somtyme it is good to hym yt prayeth to praye by mouth. And that for ma¦ny causes. Fyrste to excyte his herte to more deuocyon by tokens outwar∣de. And therfore as longe as a man or a woman is styred to deuocyon by speche or vocall prayer / by knelynge /