¶How Ihesu shall be soughte. desyred: & foūde / ca xlvi (Book 46)
SEke thenne that thou hast lost that thou myghte fynde it / well I wote who soo myght ones haue an inwarde syghte a lityll of that dignytee and that ghostly fayrnes why¦che a soule had by kynde. and shall haue by grace / he sholde lo¦the and dispise in his hert all the blysse. the likyng: and the fa¦yrnes of this worlde as the stenche of a carion. and he shal ne¦uer haue wyll for to doo other dede nyghte & daye sauynge the freelte and the bare nede of the bodily kynde but desyre. mour¦ne. & praye and seke how he myghte come ayen therto / Neuer¦theles in as moche as thou hast not yet seen what it is fully / For thy ghostly eye is not yet openyd / I shall telle the oo wor¦de for all in the whyche thou shalt seke desyre and fynde it. for in that one worde is all that thou hast lost / This worde is Ihesu / I meane not this worde Ihesu paynted vpon ye wal¦le / or wrytten by lettres on the boke. or fourmyd by lippes in soūde of the mowthe / or feyned in thy herte by traueyle of thy mynde / For in this maner wyse maye a man oute of charyte fynde hym. But I meane Ihesu crist that blessid persone god and man sone of virgin mary / whom this name betokenith that is all goodnes: endles wysdom / loue / and swetnes / thy Ioye. thy worshyp. and thyn euerlastyng blysse / thy god: thy lo¦rde. and thy saluacyon / Thenne yf it be soo that thou felyst a grete desyre in thyn herte to Ihesu. eyther by mynde of this na¦me Ihesu. or by mynde and sayenge of ony other worde / or in