¶A cōmendacōn of prayer offred to Ihū of a soule contem¦platyfe / And how stablynes in prayer is a syker werke to stō¦de in / And how euery felinge of grace in a chosen soule maye be sayd Ihū: but the more clenner the soule is ye worthyer is the grace / Caplm xlii. (Book 42)
THe soule of a man whyle it is not towched wyth specy¦all grace is blunte & boystous to ghostly werke & can no¦ughte theron / It maye not therof for weyknes of itself / It is bothe olde & drye. vndeuoute & vnsauery in itselfe / But then̄e comyth the lyghte of grace· and thrugh towchyng makyth it sharpe & subtyl redy & able to ghosty werke: and yeueth it a gre¦te fredom & an hole redynes in wyll for to be buxom to al the stirynge of grace redy for to worche after that grace styreth ye soule / For by openynge of the ghostly eye it is applied all ful¦ly to grace redy to pray / And how the soule prayeth then̄e shal I telle the / The moost specyall prayer that the soule vseth & hath moost cōforte in I hope is the Pater noster· or elles psal¦mes of the sawter / The pater noster for lewde men. and psa¦lmes & ympnes and other seruyce of holy chyrche for lettred / The soule prayeth then̄e not in maner as it dyde befor̄ in co¦myn maner of mē by hyghnes of voys: or by renable spekyn¦ge oute. but in full grete stylnesse of voys & softnesse of herte For why. his mynde is not trowbled ne taryed wyth outwar¦de thynges but hole gadred togider in itselfe / And the soule is sette as it were in a ghostly presence of Ihū and therfore eue¦ry worde & euery syllable is sowned sauerly swete & delectably wyth full accorde of mouthe & of herte? For why the sowle is torned then̄e all in to fyre of loue / And therfore euery worde that it pryuely prayeth is lyke to a spercle spryngyng out of a fyre bronde yt chaffith all ye myghtes of the soule & torneth hē