Page 72
QUid nunc canorâ pangere barbito
Musas coëgit carmina? Principis
Adventus est, aegros Edinae
Sic qui animos reficit Camoenae:
Arsit suorum visere Rex bonus
Fines remotos, impatiens morae:
Non illum, opes si polliceris
Attalicas, licet impedire.
Namque in popellum crescit amor suum:
Natalis illi est aura cupidini;
Gaudetque campos intueri
Rex proprios, Patrios penates:
Miranda virtus carmina postulat:
Pax, non priori cognita saeculo,
Qualem per orbem non videbit
Sol rapidos agitans jugales.
Nomen timendum gentibus exteri••
Evasit: hujus finibus imperî
Durabit ingens & colendum,
Quod tribuit pietas fidesque.
Tot regna sanctis subdita legibus,
Sincera & horum Relligio, tuo
In corde virtutum repostam
Congeriem penitùs recludunt.
Tu charus Anglis, optime Principum,
Te Rege pacem servat Hybernia.
Passimque Scoti gestientes
Excipiunt avidè reversum.
Jacobus Loganus.