Page 278
PHoebus cùm eoïs nitidum caput exerit vndis;
Cùm cursum rapidis fervidus vrget equis;
Cùm croceis aurora genis fulgescere coepit;
Phosphorus & rutilo cùm vigil axe micat;
Tunc laetus pullum mundus deponit amictum,
Membraque vestitu millicolore tegit;
Tunc volucres tremulas modulantur gutture voces;
Tunc renovat solitum rusticus acer opus:
Tunc flores, segetes, virgulta, hominesque, ferasque,
Et lustrat radiis abdita cuncta suis.
Non aliter, Rex magne, orbis Sol, magna Britannûm
Lux, Heliconiaci gloria magna chori,
Vt Nithiae optatus tetigisti limina amoenae,
Omnia laetitiae signa dedere suae.
Dulcisonis altè resonant loca cuncta camoenis,
Plausibus & laetis compita cuncta sonant.
Hinc Themis, & Pallas, Charites{que} & laetus Apollo
Harmonicis gressus composuere sonis.
Ergó dies lucem, volucres modulamina Soli;
Debebunt Musae carmina nostra tibi.
Samuel Kello.