Prolicionycion [sic]

¶ Capitulum 15

ANtonius pius with his sonnes Aurelius and lucius was Emperour two and twenty yere / he had suche a name that in al his kyngdome he withhelde the caucions of his dettour and foryaue the dettis. And therfor he was callyd the fader of the countreye. And m•• sayd that he wolde saye ofte in this maner Me is leuer by the ensample of Scipion saue one cyteseyn than ouercome a thousand enemyes •• His doughter faustina sawe swerde men fyghte and cast soo grete loue to one of them that she was seke for loue· And she tolde it to her owne husbond Mar∣cus Antonius / Thenne by counseyll of phisiciens of caldea that swerde man was slayne and faustynas bodye enoynted with his bloode And soo the sorow cesed· Also many men of straun¦ge nacions dyde of her armure / and putte the causes of her stryf vpon Antonius and were redy for to stonde to his ordenaunce and dome / Ieronimus de viris. In his tyme policarpus bisshop of ephesim that was disciple to Iohan theuangelyst come to ro∣me and conuerted many men oute of theyr heresye / And was afterward brente in his own chirche. After Iginus pius was pope fyften yere. At his prayer hermes wrote that booke that is cleped pastor / therinne it is wreton that esterday shold not be hol∣de but on a sondaye by byddynge of the Aungele that shewed him in the clothynge of a fyssher / ¶ Aboute this ••yme Tro••tus pompeus of the nacion of spayne was in his floure•• / He wrote the storyes of al the world from Nynus tyme kynge of Assiria vnto the tyme of the hoole lordshippe of Emperours

in xliiij bookes / his disciple Iustinus abredged those bookes This Iustinus was a pleder and a wryter of historyes. Also this iustinus wrote the book de cristiana religione to antoni{us} pi{us} And therby he made hym the more goodly After pius Anite¦tus was pope as it were ten yere / he badde that clerkes sholde be shauen rounde aboute and haue no longe lockes ¶ Galyen the phisicien that was born at pergamus was in his floures at Ro∣me· he expowned ypocras bookes and not only them but he made many volumes of his owne Me sayth that for resonable absti¦nence that he vsed he lyued honderd and fourty yere / he ete neu{er} ne drank his fylle nether ete rawe fruyt. ¶ He hadde alway a swete smellyng breth / he deyde for age and for non•• other euyl That tyme hirmeus episcopus lugdium was flourynge he expowned many bookes of holy wryt ¶ And ptholomeus a connyng man of the science of mathematyke was in his flowres he made more of astronomye than was made to fore his tyme. This man was of straunge wacche and of lytel mete and had a swete breth. he made many b••okes that ben named Almages∣tus perspectiua and in Iudicijs quadripertitum and centilog∣um ¶Amonge his prouerbis tweyne ben famous and noble he is heyghest amōg men that retcheth neuer / who hath the world in honde. and other men ben not amended by hym that is not amended by other men