Prolicionycion [sic]

¶ Eutropius ¶ Capitulum 6

THe seuenth and the last kynge of the Romaynes hadde thre names Lucius tarquinus and Superbus / He slough his wyues fader Seruius tullius and regned fyue and twenty yere·

This foūde vp first diuse maner tormentes among the romains as bandes boleyerdes plates battes prysons gyues cheynes out lawyng and exylyng / he ouercome the vultes and the gabyes & made pees with the tuscans / Augustin{us} de ca / li 2 ca 14· Atte last he bylde a temple of Iupiter in the hille carpelus & for they foū∣de a mannes heede in that place while they· digged they cleped that place capitolium / wherfore theyr prophetes & dyuynes tolde that that place shold be heede of the world· Titus li{us} / & aug{us} de ci li· 1. ca 19· Somtyme while this tarquinus superb{us} besieged the Cyte ardea that was rebell to Rome / his sonne tarquinus sextus and lucrecias husbonde tarquinus collatinus satte at soper and talkede of the chastyte of her wyues / lette be quod collatinus· & lette theyr owne dedes preyse our wyues / therfor as it were by assent they came by nyght to Rome and founde lucrecia all one wakynge aboute wol werke and other mennes wyues were a sleepe and somme aboute gyglotrye· wherfor Sixtus tarquinus wayted his tyme and was lodged with lucrecia in gestwyse· and cam vpon her while she slepte with his swerde drawen to lig¦ge by hir maugre her teth And sayde but thou suffre me lye by the I shal put a naked churle deed withthe in bed. and thou shalt ligge deed with hym also / Than whan this sextus had done that dede the woman went hir wey sorowfully / and sente to hir fader and husband and prayed them to come home out of the hoost & enformed them the mishappe that hir was bifalle· & they yaue feyth and credence to hir messagier and she toke wreche of the de¦de and slough hir self bifore hem with a priue knyf that she ba∣r•• ¶ R Wysemen here saye that lucrecia here slough not hir self· for no vertu but for shame & for angre for neither mā ne womā shold be punysshed without gylt / neyther gylt without Iugge / But for the romaynes coueyte moost praysyng of men & world¦ly worshipe This lucrecia had drede yf she lyued after that de¦de lest the peple wold wene that she were assentyng to the dede / And therfore in token that she was sory therof / in conseruynge hir good loos and name and in a voydyng the despyte. and in example of good women he wold no lenger lyue / Of this happe speketh a dytour or retricion as seynt austyn de ci li 1 ca 19 tou∣cheth tweyn ther were and one brake spousage / Eutr. By cause of this dede the people gadred to geder / and putte downe and deposed his fader· from his kyngdome / and exyled hym and his childer ¶ The hooste that was with the kynge at Ardea

forsoke tarquinus the kinge And whan the kyng came to ro∣me and fonde the yates closed ayenste hym / he and his childre wente away / After that kynges were put oute of the Cyte and two consuls were ordeyned to gouerne the comontee. that were Iunius brutus and tarquinus collatinus lucrecias husband but er the yeres ende lucrecias husbād was put out of his offi¦ce of cōsul for hate of his name bicause he was callyd tarquinus For the / romains wold that no man that bare that name shold bere offyce in the cyte •• neyther dwel therin / And that in despyte of the spouse brekyng that tarquinus sextus had done R Austyn de / ci / de / li / 2 / ca / 14 / & .15 / Seyth that lucrecias husbond was put out of his offyce within the yere by fraude of his fela¦we that other consul· Augustin{us} / li. 3 ca / 14 & Titus / Whan Tar¦quinus was soo put of he sente messagiers in to the cyte and his messagiers had pryue coūseil with the sonnes of brutus the con∣sul and with vicilles the bretheren of brutus wyf· The counseyl was that Tarquinus shold be brought to his estate in the cyte agayne / but this came out by a seruaunt of the vycellyes / and was knowen and told to the Senatours / Than brutus the con¦sul did them to deth euerychone R Virgile speketh herof in fine sexti libri eneidis ¶Eut^o. libro primo / ¶ Than Tarquin{us} gadred help on euery syde and warred ayenst the cyte for he ho∣ped to be restored in that maner / and in the encountrynge and fyghtyng Brutus· the conseyll and Arnus tarquinius slough eyther other and tarquinus faught thryes in thre yere ayenste the Romaynes and was onerco men ¶ Therfor he went in to tus¦culus with his wyf and lyued there fourtene yere / But the for∣seyd brutus the consul / was soo poure whan he dyed that he had no money to burye hym with but as it was gadred among the peple / ¶ Petrus 176 & Trogus libro primo