Prolicionycion [sic]

¶ Petrus 213 ¶ Capitulum 36

DEmetrius sother selencus sone wēt out of the cyte of rome & occupyed the citees by the see side & bygā to regne & regned in asia· & in siria twelue yere For he come to Rome in childhode to

accuse his vncle Antiochus epyphanes that had put hym out o•• his kyngdome / Therfor whan he herd that this vncle was deede he went ayene and many receyued him for her lord / and kynge soo that the hoost of siria wold slee licia / and the yong antyochus that was aboute to reygne Alchimius made preest of arons or¦dre accused machabeus to this demetrius of many manere thyn∣ges and dedes / therfor he was sente with bachides to destroye the Iewry but Iudas withstode hem soo that they spedde not / ther∣fore alchimius torned ayene to the kynge Nychanor was sente of the kynge ayenste ¶Iudas and was slayne and his hede & his right hande were hanged toward Ierusalem / for he hadde prowdly spoken. And Iudas was connexed in frendship with the romayns and the couenaunt was wryten in tables of bras Iudas machabeus was slayne of bachides and alchimius and his broder ionathas roos in his stede & was leder of the Iewes nyneten yere / ¶ While alchimius bygan to destroye god∣des hows and the werkes of prophetes / he was smyten with a palesye and dyed· Bachides torned efte to the kynge and than two yere the lande was in quiete and in pees. Alysaundre anti¦ochus epyphanes sonne occupyed tholomayda and achon and confedred to him Ionathas and slough demetrius the kyng and regned nyne yere in Siria and in asia and wedded cleopatra tho¦lomeus doughter / Demetrius· demetrius sonne that fledde in to creta to his moder kyn whan his fader was slayne he cam aye∣ne and gadred him strengthe and occupyed the landes by the see side and tholomeus gaf him his doughter Cleopatra to wyf / the whiche he had byfore yeuen to alysander and soo tholomeus that traytrely occupyed Alysanders Cytees entred in to Antiochia and toke on hym twey dyademes of egypte and of asia Aly∣sander was ouercome of hym and fledde in to arabia with his so∣ne antiochus to his moders cosyns but the kyng of Arabia drad tholomeus strength and sente hym alysaundres hede / tholomeus dyed the thyrd day after that and demetrius regned ¶ Petrus 219 Ionathas was accused to demetrius that he had wonne the tour in Ierusalem but he sente grete yeftes to demetrius and gate grace of hym soo that he had renewed the pryncipate and the presthode / Thenne demetrius was assured that the londe shold be in pees in his owne honde. he lette his hoost go home euery mā to his owne place and heelde with hym a straunge hooste Ther∣for the peple hadde indignacion of the kyng and Ionathas sente

the kyng thre thousand of chosen men that chacede the traytours Atte last one tryphon that was somtyme one of Alysaundres frendes in to arabia and brought thens the yong Antyochus ali¦sanders sonne and crowned him kyng and faught ayenst demetri¦us and ouercome hym and chased hym and Antiochus made frendship with Ionathas and sent hym vessel purpre and laces of sylke. and made his broder Symon duk and leder· After that Ionathas renewed frendship with the Romayns and with the sparciates Eutropius libro quarto / ¶ The thyrdde batayll pu¦nicum aroos for whan the men of cartage hadde do away theyr shippes / and her armoure· hem for thought the dede and for hem laked bothe bras and yren they made hem armour of gold and of siluer and made hem twey dukes and leders eyther heet astru¦bal the yonge Scipio the grete Scipions neuewe ouercom•• hem both and toke the cyte and destroyed it with fyre soo that it brēt six••ene dayes to geders soo that stones were bren••e to asshes and to powder. and soo cartage was destroyed aboute the seuen hon∣derd yere after that it was first bylde· R / That is soth for to acoū∣te from kyng danidris tyme. So w••ll the maystre in storyes / but loke more herof in the first book capitulo de affryca ¶ Orocius li¦bro quarto Than kynge Asdrubals wyf for manly sorowe & womanly wodenesse threwe her self and her twey sonnes in to the myddel of the fyre and soo the last lady of cartage had right suche a maner ende as dydo the fyrst lady had. ¶ Augustinus primo libro capitulo visesimo nono Whan the thyrd batayl pu∣nycum was ended / Marcus cato counseylled that cartage shold be destroyed but scipio nasica counseylled the contrarye and wolde not assente / that it shold be destroyed that sikernesse sholde be enemy to the brutel wyttes of Romayns for as a wardeyn and keper is nedeful to a childe soo is drede nedeful to cytezeins and that was pr••ued by the same dede. for whan cartage was destro∣yed / than fylle many myshappes cruel stryf and tresone thefte & robberye sleyng of cytezeyns and exylyng and moche other soro¦we. soo that the Romaynes loste the honneste of vertues and of thewes and suffred more cruelnesse and sorowe of theyr owne neyghbours and cytezeyns than of strange enemyes / this knew wel scipio and wolde not assente that cartage shold be destroyed for he wold that the outrage sholde be chasede by drede