Prolicionycion [sic]

¶ Capitulum 20

Office and dignyte be chaunged amonge the Romaynes / For in stede of twey consuls be made trybunes of cheual∣rye with the power of consuls Tho began the prouffyte of ro∣me tencreace but this dignyte dured not longe / R· Aboute this tyme dyogenes the philosopher prospered. Iosephus in pol libro suo septimo seyth that dyogenes was Anaximines disciple Ieronimus libro suo contra Ioninianum seyth that he was an tistenes that was Socrates disciple and that I trowe sothly For Seneca and valerius seyne that dyogenes was in the grete Alysaundres tyme that regned long after Anaxagoras but yf ther were many dyogenes in dyuers tymes as ther were many Socrates Ieronimus contra Ioninianum Dyogenes vsed a double mantel for colde and had a scrip in stede of his celer· and a staff to lene to and dwellyd in yates & outgoyng of yates and knowleched soth in yche side and toke heede of the lyf of men that passed by the wey / For many maners of men stanke as him semed Whan that he punysshed hym self in a tonne. yet he had game that his hows moeued ¶ He torned the mouth of his tonne toward the south in cold time and toward the north in Somer tyme where euer the sonne were dyogenes hows torned thyderward ¶Valerius libro quarto capitulo tercio ¶Alysaū¦der Macedo came to hym syttyng soo in his tonne and bade him axe somwhat of hym / I wolde sayd this Dyogenes that thou woldest not lette my sonne Therof came that bysawe that aly¦saunder myght lyghtlyer putte darius out of his trone and oute of his kyngdome than dyogenes oute of the state of vertue ¶ R Seneca libro quinto de benefycijs Seyth that dyogenes was myghtyer and rycher than alysaunder· ffor ther was moore that he wold not receyue than Alysaunder myght yeue & thēne Alysaunder was ouercome for he foūde a mā to whom he might nought yeue and he myght take from dyogenes right nought / ¶Seneca epistola 94 et Ieronimus contra ¶ Dyogenes bare in his scrippe a dysshe of tree for to drynke of· and sawe a childe drynke of the pawme of his hande / and braake his disshe anone / and sayd how long shal a foole bere superflue fardels I wyste not rather that kynde had crafte of drynkynge and he alway after drank water of the pawme of his hande He neuer abated countenaunce neyther his thought / what euer mishappes

befel him he neuer chaūged semblaūt / he thought neuer of dise∣ase neyther of fortune. he chaunged neuer his purpoos for soro¦we neyther for meschyef and sayde It falleth not to a philosophre to chaunge his wytte for happe of fortune / his deth shewed that he was vertuous and continent. For whan he was old he wente to the tornemente of Olimpe / He was taken with a feuer in the waye and laye in a den by theway and his frendes wold haue caryed him thens on a beest / or on a chare but he wold not as∣sente but wente to the shadow of a tree and sayd I pray you go ye hens and cesse / For this nyght I shal essaye whether I shal ouercome or be ouercomen / If I ouercome the feuer I shal co∣me to the tornament and yf the Feuer ouercome me I shall go downe in to helle and leyde downe his heede and neck and was there al nyght· and shewed not only that he wold dye· but also that he wold putte ouer the Feure by deth / And in caas was he gyled by ensample and oppynyon of noble men that wold glad¦ly dye and help to her owne deth I trowe that he cleped helle the state of the sowle after the deth of the body ¶ Valerius libro 4 capitulo 3 ¶Dyogenes weded wortes vpon a tyme and one ari¦stippus sayde to hym yf thou woldest vse flatery with denys the kyng thou ne shulde nede to wede wortes. ¶And▪ he answerde yf thou woldest ete of these wortes. thou woldest not flater with denys Also dyogenes disputed on a tyme of wrath and one spy••ce in his face and he sayde I am not wroth but I doute whe∣ther I shold be wroth or noo Seneca de ira libro tercio Dy∣ogenes pleted ones in cause and one lentulus spetted and thre∣we ropy spotel in his face & he wyped his face and sayd I shal say after this that they al be begyled that say that thou hast noo mouth ¶ Pol libro octauo ¶ One behilde dyogenes and sayde thou hast right wanton gygly eyen wherfor his disciples wolde haue beten the man as a lyer. lete be felawes sayde Dyogenes For I am suche one by kynde but I refreigne me by vertue ¶ R Iuuenal libro 4 satira prima / wryteth that Dyogenes wolde wepe whan he went out openly among men / for he demed al that he sawe was wretchednesse and woo But democritus dide the contrary and lough vhen he went openly oute amonge men for he helde al that he sawe ny••sty and fooly In libro de dictis philosophorum One that was fowlest of al men shewed his hows to Dyogenes / the hows was wonderly plesaunt and welbesene and this dyogenes spytte in the mannes face /

And men axed of him why he dyd soo / and he answerd and sayde for I saw noo soo foule place in his hows as his face / Also it was axed hym why he vsed a berde ¶A woman sayd he berded / is vnsemely syght ¶ One sayd to hym that one of his frendes had spoken euyl by hym ¶I doute sayd he yf my fr••nde haue sayde suche wordes by me / But it is openly knowen that thou hast that thynge sayde ¶Treuisa ¶It is wonder that dyo¦genes vsed so lewed sophistry / For here he maketh noo differen∣ce. bytwene the lyer and hym that accused the lyer and war¦ned men of his lesynges ¶It is not one to speke euyl by a mā and warne hym that a man speke euil of hym / and rehe••ce what euyl was sayd ¶ Seynt Iohan in his gospel sayde not that the deuyl was in crist but the Iewes sayde that the deuyl was in criste And crist hym self despysed not god but he reherseth how men bere him on hand that he despysed god ¶Than it folo••weth in thystory Also one sayd him that al men despysed him And he sayd wytte and wysedom must be despysed of foly Whan euyl spekers blame and missaye a man· it sheweth that he is right good that is of hem myssayde Tullius libro primo de tusculis questione ¶Dyogenes whan he shold dye bade that he sholde not be buryed but throwen and lette lygge in a felde / owther vpon an hille ¶ Than his frendes sayden that he shold be eten with beestes and fowles / Nay quod he but laye a s••aff by me that I may therwith kepe hem away ¶ Wherto sayd his frendes for thou shalt not fele than sayd he the etyng of the bees••tes shal not greue me whan I shal not fele