Prolicionycion [sic]

¶ Capitulum 13

THe peple of Rome made stryfe as though they were mys∣ledde by the Senatours / therfore they made hym trybu∣nes as defendours of the people ayenste the consuls· Quintus

Marcius duc of Rome that had taken the vultes bifore. was putte oute of the cyte and was wroth and wente to the vultes· that he had rather taken and had help of hem and wente for to warre and destroye the countre fyue myle from Rome and ouer come efte the Romaynes and forsoke pees that they profered & cessed not to warre and greue the Cyte till his moder and his wyf came oute of the Cyte and prayde for the cyte ¶ Thre hon∣derd noble men called Familia Fabia faught allone ayenst the vegenses and weren smyten to deth The Romaynes be biseged in the mount algyd and lucius quincius delyuerd hem. he was taken from the plough and made a dictatour he wiped awaye his swat and toke on a royall gowne ¶ Egypte forsoke Darius kyng of Perse and wold not be vnder hym ¶Pompilia a may¦de at Rome was taken in lechery and was buryed quyck a lyue. Pyndarus and symonydes the poetes were tho in her flowres Trogus libro secundo After the deth of pisistratus the tyraunt of athene one of his sonnes toke a mayde by vyolence and laye by hir / and therfor the maydes brother slough hym ¶That other broder named Espyas helde the kyngdome of Athene after his fader and made hym be taken that had slayne his brother / and whan the mansleer was compellyd by torment to knowlege the men that were assentyng to the mannes deth. he accused and ap∣pelled all the hispias the tyraunces frendes / and whan they all were slayne hispias axede yf ther were ony moo consentynge to his broder deth And he answerd and sayde / There is no man alyue worthy to dye but thou allone ¶ Than the peple knewe the vertue of the yong man & put espyas oute of the cite Than hispias wente anone in to Perse to darius the kyng and exited him ayenst them of Athene ¶Orocius libro secundo This da∣rius after that he had rekeuerd by / bataylle the Assyryes and the Babylons that rebelled ayenst hym / he ordeyned batayll & warre ayenst Anticirus kyng of Schites for he had axed the ma¦riage of his doughter and had it not And wente forth with vij.C / thousande men of Armes and loste seuentythousand by so∣dayne reses & skarmysshes Netheles in retornyng he chastysed the macedoynes and the Iones Also he ordeyned a batayll ayenst the men of Athene for they helped and were assistente to Iones Netheles the men of Athene with ten thousande mette so many thousand / and were so glad for to fight / So that whan ther we¦re a thousand paas bitwene the shiltrons / the cours was so sped

that the strokes came bifore the enemyes ¶Than ther was soo strong fyghte· that they semed men on that one side and beestes on that other Trogus libro secundo The perses were ouerco∣me and fledde to theyr shippes. of the. whiche shippes many we∣re dreynt and many were taken In so grete a vyctorye it we∣re harde to telle who that gate the pryce / Netheles one Cynegy∣rus a knyghte of athene. after many grete dedes and slaughters pursued the perses that fledde to shippes there a shippe that was laded he held with his right hande til it was smyten of / and eft with the lif•• hande & lost it / and whan he had lost both his hādes he bote on and helde the ship with his teth so that the stok of a man faught with his teth as it were a woode beest ¶ Two hon∣derd of the perses dyed there with hipius the tyraunt / And sone afterwarde darius dyed the yere of his kyngdome xxxvij / and lefte many sonnes a lyue ¶ Amonge his sonns Artaxerses as he that was begeten in the kyngdome and he had the grete ci¦rus to his moder grauntsir that was auaunced to the kyngdom /