¶ Capitulum 12
THe name of philosophres had begynnyng of Pyctagoras / for old grekes callyd hym self sophistris that is wyse / but Pyctagoras whan me axed what man he was / he answerd and sayde that he was a Philosopher that is a louer of wytte and of wysedom for to clepe him self a wyseman it wold seme grete boost & pryde / Afterward other philosophres hadden her names of her auctours ¶And soo they that held pyctagoras loore / were cal∣led pyctogoraci· And they that helden Platoes loore were cleped platonici ¶Pol̄ libro primo Somme philosophres hadden na∣mes of contrees & so they that helden pyctagoras lore were cleped Italya / For Pyctagoras taught a grete contre of Italye / that somtyme was called the grete grecia / Other were callyd Io∣nyci / that hadden that name of the yonder grece / theyr Auctor & prince was tales and millesius Ysidorus libro octauo ¶Other had names of standyng and comyng to geders as stoycy· acha¦demice peripatetici Stoyci had that name of a porche of Athe∣ne called Stoa in the langage of grece ther in was peynted the grete beryng and dedes of wisemen. and of strong The firste of hem was yeuen that all synne was lyke grete and thus he mea∣ned that it were as grete synne to stele strawe as gold & to slee a knyght as an hors for the beest he saide is not to blame but the mannes wylle ¶ This Zenon̄ sayd that mannes soule shal dye with the body. Treuisa I wolde a wyseman had seen his water /