¶ Regnum Shitarum ¶ Capitulum Octauum /
THe kyngdom of Shytes in the North by cause af age and of tyme axeth the second place in ordre / And is sette after the kyngdom of Assiries And began in Saruges tyme vnder thanaus the first kyng that was there / Sarug was Abrahams fader grauntsyre ¶ It semeth that the Ryuer Thanays hath the name of this kynge thanaus the whiche Ryuer in the north side of the world departeth bitwene Asia and Europa· ¶ This kyngdom was neuer ouercome but thryes it conquerd asia and ouercome Darius kyng of Perses and slowe Cyrus the kyng and did awaye Zephiron that was the greet Alysanders leder ¶ Petrus capitulo 60 ¶ Also another kyngdom was in the west & was the kyngdom of Scicions that is of archadia a par∣tie of grees in europa and dured vnder Agilaus first / ix·C yere