Prolicionycion [sic]

¶ Iacob· ¶Capitulum duodecimum

THis yere that was the seconde yere of Fanus Iacob an honderd yere old and thrytty wente with his childer doū in to Egypte ¶ Augustinus libro octodecimo This yere apis the kyng argolicus sailled in to Egypte & dyed & was y cleped Serapis Varro tellith why he was cleped serapis and saith that the chiste that he was put in was cleped Seron in grewe / And therfor apis was named Seronapis and afterward by withdrawyng of lettres as me vseth he was called Serapis That whyte spekeld oxe that men of Egypte for it was worsh∣ped a lyue it was cleped apis / And whan that oxe was deede they ordeyned hem another oxe that was also whyte specled & tenderly nourysshed and worshipped ¶ Hugo capitulo Apes That bole hete Apis that was wonte to come out of the Ryuer Nylus and warne by his pleyng and startlyng what was to co¦myng ¶Petrus Somme telle that euery yere in Serapis fes¦te / come vp a boole oute of the Ryuer Nylus and had a whyte marke in the right shulder shapen as a newe mone / And whan the Egipciens came to hym with al maner musick and myrthe y^t bole was lyfte vp in to the eyer as it were with Iolyte & with the meouyng and styntyng of that boole· the Egipcians moeued & stynt vpō the erth / but that boole vanysshed out of theyr sight that same daye Therfor the Egypcians worshipped that boole for than man Apis and a cowe in stede of Isis that woman & a boole also for Iupiter Therfor it was a grete abhominacion among the egypcians to slee neet or ete ther flesshe ¶Argus the fourth kynge of Argyues began to regne and regned six and fourty yere In this tyme grees hadde sede brought oute of o∣ther landes and gan to ere and sowe and haue corne tylled the rinne Iacob an honderd yere old and seuen and fourty blessid his childer & yaf to euery of them his blessynge & dyed & was enoynted and kept thrytty dayes and atte last born in to ebron and buryed there in the double graue ¶Petrus. It was the maner of mysbyleued men for to kepe a dede bodye nyne dayes withoute oynement and make sorow for hem nyne dayes and wasshe the bodyes nyne dayes for to wytte whether the soule we¦re apassed or noo ¶Afterward they kepte the bodyes fourty

dayes enoynted But it was the maner of Iewes for to kepe dede / bodyes seuen dayes without oynement / and afterward thryt¦ty dayes enoynted Augustinus libro octodecimo ¶ Me seyth that Promotheus· Rapetus sonne and athlas the Astronomer his broder made men so seyth ouidius in magno / ¶Netheles that is seyde / for of men that were vnconnyng & boystous as beestes they made connyng men and wyse Ysidorus tercio decimo Also for me redeth that they made ymages of men goo and wal¦ke on the grounde by a certeyn crafte ¶Also thes fonde firste a ring of yren and closed therinne a precious stone and cleped it a nayle. ffor as the nayle is closed in the flessh so is such a stone closed in the / metal Hugo capitulo Annulus Annulus is a ring seid of anus an ers. ¶For somtyme theues and mansleers whan they were taken shold bere an ape on her neck and holde her mouth atte apes ers. but this foule vsage ceesed and theues man¦slers whan they were taken shold bere ringes of yron in her fyn∣gers And therfor gentilmen for to haue dyuersite and distinc¦tion from suche brybours made hem rynges of gold or of syluer ¶Ysidorus libro 19 in fine / Gentilmen vsed her rynges of siluer and of gold on the fourth finger that is cleped the leche by cause of more heyghting and fayrenesse / for in that fynger is a veyne that stretcheth to the herte But Romaynes had rynges of the comune tresory gentilmen had rynges and other had solidi that were hool and sound ¶Free men of bloode vsed rynges of gold Fre men that came of bonde men vsed rynges of syluer / but bond men vsed rynges of yron ¶Somtyme it was a greet diffamaci∣on for a man to vse moo rynges than one· ¶Augustinus de ci. This promotheus had a brother that heete Athlas and was an Astronomer. therfor men feyned that he bare heuen ¶ Also a greete hille in Affryca heete Athlas / by this man Athlas name. and the lewde peple wene that that hille bere vp heuen Petrus

¶ Me seyth that Trycolomus went that tyme in his ship that was peynted with a dragon in to Grece and made there more craft of tyllyng of feldes / Also that tyme Ceres that woman that the grees calle demetra without Instrumentes that she fond vp of eeryng craft She founde also vp mesures of whete for bi∣fore they deled whete / by huples smal or grete R After that tyme grees began to haue tylth of corne so seyth ysidorus libro 5 / ¶Ioseph an honderd yere old and ten deyed in egypt and was enoynted with swete oynementis and kepte vnto the goynge of

the children of ysrael out of Egypte an honderd yere and foure and fourty in the whiche tyme the hebreus serued the egipcians ¶Also as Iosephes bretheren dyed eueryche after other they were buryed in ebron ¶Netheles afterward her bones were born in to Sychem with Iosephes bones that place heete nowe neapolis the cyte of Samarytanes And so from that tyme that Iacob come in to egypte vnto that tyme that the hebrewes the childer of Israel wente out of Egypt were two honterd yere and fyften