Prolicionycion [sic]

¶ Capitulum Trisesimum Tercium /

THenne whanne the Erle of marche and therle of warwyk hadde mette to geder on Cottiswold Incontynent they con∣cluded to go to london / And sente worde anone to the Mayer and to the cyte that they sholde come / Anone the Cyte was gladde of theyr comynge hopynge to be relyeuyd by them / And soo they cam to london / And whanne they were comen and hadde spoken with the lordes and astates / thenne beyng there concluded for as

moche as kynge harry was gone with them northward / that he had forfayted his crowne and ought to be deposed acordyng vn¦to the actes made and passed in the last parlement / /

And soo by thaduys of the lordes spirituel and temporel thenne beynge ot london· the erle of marche Edward by the grace of god oldest sone of Rychard duke of yorke as ryghtful heyr and next enherytour to his fader / the fourth day of marche the yere of oure lorde Lix toke possession of the Royamme of Englond at westmynstre in the grete halle. And after in the chirche of the ab∣bay and offryd as kynge berynge the Septre Royall / to whom alle the lordes bothe spirituel and temporell dyde hommage and obeyssaunce as to theyr souerayne / lyege / and lawfull lord and kynge / And forthwith it was proclamed thurgh the Cyte kyng Edward the fourthe of that name / And anone after the kyng roode in his Ryall astate norward with all his lordes for to sub∣due his subgettis that tyme beyng in the north / and tauenge his faders deth / And on palmsonday after he hadde a grete bataylle in the northe countrey at a place callyd Towton not fer fro yorke / where with the helpe of god he gate the felde and had the vycto∣rye· where were slayne of his aduersaryes xxx thousand men & moo as it was sayd by men that were there / In whiche bataylle was slayne the erle of northumberlond / the lord clyfford / Syr Io¦han N••uyll / the Erle of westmerlandes brother / Andrewe Trol¦lop / and many other knyghtes and squyers / ¶ Thenne kynge harry that had ben kynge beynge with the quene and Prynce at yorke / heerynge the losse of that feld and soo moche peple slayn and ouerthrowen / anone forthwith departed al thre with the duc of Somersete / the lord roos and other toward scotland / And the next daye kynge Edward with all his armye entryd in to yorke / and was there proclamed kyng / and obeyed as he ought to be / And the mayer Aldermen and comyns sworne to be his lyege men / and whanne he hadde taryed a while in the north and that alle the countrey there had tourned to him / he retorned southwarde leuynge the Erle of warwyck in tho partyes for to kepe and gouerne that countrey / And about mydsomer after the yere of oure lord god a thousande four honderd and syxty / And the fyrste yere of his regne he was crowned at westmynstre and enoynted kynge of Englond hauynge the hoole possession of all the hoole Royamme / whome I praye god saue and kepe / and sende hym thaccomplysshement of the remenaunt of his rightfull

enherytaunce by yonde the see / And that he may regne in them to the playsyre of almyghty god / herthe of his sowle / honoure and worshippe in this presente lyf / and wele and prouffyte of alle his subgettis / and that there may be a veray fynal pees in al cry∣sten Royames that the Infydeles and myscreauntes may be with∣standen and destroyed / and our feyth enhaunced / whiche in thyse dayes is sore mynuysshed by the puyssaunce of the Turkes and hethen men / And that after this presente and short lyf we maye come to the euerlastyng lyf in the blysshe of heuen / Amen