Prolicionycion [sic]

¶Capitulum 28

THis yere were taken four grete Fysshes bytwene Eerethe and london / that one was callyd mors maryne / the second a swerd Fysshe / the other tweyne were whales / In this yere for certayne effrayes done in the north countre bytwene the lord egre¦mond / and therle of salysburyes sones / the sayd lord egremond whome they had taken was condempned in a grete somme of mo¦ney to the sayd erle of Salysbury / and therfor commysed to pri¦son in newgate in london / where whanne he hadde ben a certayne space brake pryson and thre prysoners with hym and escaped / & wente his way / Also this yere therle of warwyk and his wyf wente to calays with a fayr felawship & toke possession of hys offyce / Aboute this tyme was grete reformacion of many mo∣nasteryes of relygyon in dyuerse partyes of the world / whiche were reformed after the fyrst Institucion and continued in ma¦ny places. Also about this tyme the crafte of Enpryntyng was fyrst founde in magounce in Almayne / whiche crafte is multy∣plyed thurgh the world in many places. & bookes ben had grete chepe and in grete nombre by cause of the same crafte

This yere was a grete batayll in the marches bytwene hongary and turkye at a place callyd Septegrade / where Innumerable turkes were slayn more by myracle than by mannes hond / For only the honde of god smote them / Seint Iohn of capestrane was there presente / & prouoked the cristen peple beyng thenne aferd to poursiewe the turkes where an Infynyte multitude were slayn and destroyed / the turkes sayd that a grete nombre of Armed men folowed them / that they were aferd to tourne ageyne / they were holy angels / ¶This yere the prysonners of newgate in london brake theyr prysonne and wente vpon the leedes and fought ageynst them of the Cyte and kept the gate a long while but atte last the toune gate the prysonne on them / and than they were put in fetherys and yrons and were soore punysshed in en∣sample of other / In this yere also was a grete erth quaue in na¦ples / in soo moche that ther perysshed fourty thousand peple that sanke there in to therth / Item In the yere six and thyrtty saynt Osmond sōtyme bisshop of Salysbury was canonysed at Rome by pope Calyxt / ¶And the sixtenthe daye of Iuyll he was translated at Salysbury by the Archebisshop of Caunterbury and many other bisshops / ¶And in August after Syre pyers

de brese•• seneschal of normandy with the capitayne of depe and many other capytaynes and men of warre wente to the see with a grete nauye and cam in to the downes by nyght· and on the morne erly byfore day they londed and cam to Sandwyche both by lande and water / and toke the toune and ryfled and despoil¦led it / And toke many prysoners / and lefte the toune al bare / whiche was a ryche place and moche good therynne / And ladde with hem many ryche prysoners / ¶ In this yere in many places of Fraunce / Almayne / Flaundres / Holond / and Zelond children gadred them by grete companyes / for to goo on pylgre∣mage to saynt mychels mount in normandye / whiche cam fro fer contreyes / wherof the peple merueylled and many supposyd that somme wycked spyryte meuid them to soo doo / but it endured not longe by cause of the longe way and also for lack of vytayll as they wente. ¶ In this yere Raynold pecok / Bisshop of Chychestre was founden an heretyke / and the thyrdde day of De∣cember was abiured at lambhyth in the presence of the Archebis∣shop of Caunterbury and many Bisshops and doctours / and lordes temporall / and his bookes brente at poulus crosse / Ye haue herde to fore how certayne lordes were slayne at saynt Albons / Wherfore was alwey a grutche and wrath had by the eyres of them that were soo slayne ageynst the Duke of yorke / the Erles of warwyck and of Salysbury / wherfor the kyng by thaduys of his counseylle sente for them to london / To whiche place the Duke of york cam the syx and twentyest day of Ianyuer with four honderd men / and lodgeat Baynardys castel in his owne place / And the fyftenth day of Ianyuer cam therle of Salysbu¦ry with fiue honderd men / and was lodged in therber in his ow∣ne place / And thenne cam the dukes of excetre and of Somerse∣te with eyght honderd men / and lay withoute tempelbarre / And the Erle of northumberlonde the lorde egremond / and the Lord clyfford with fyftene honderd men / and lodged withoute toun And the mayer that tyme gefferey boleyn kept grete watche with the Comons of the Cyte and rode aboute the Cyte by Holburn and Fletestrete with a fyue thousand men wel armed and ara∣yd for to kepe the pees / And the fourtenth day of Feuerer therle of warwyck cam to london from Calays wel beseen and wor∣shipfully with six honderd men in reede Iaquettys browdryd with a ragged staf behynde and afore / ¶ And he was lodged atte gray Freres / And the seuententhe daye of Marche

the kynge cam. to london and the quene / And there was a con∣corde and pees made amonge these lordes / and they were sette in pees / ¶And on oure lady day the xxv day of marche a thou∣sand four honderd and eyght and fyfty / the kyng / quene. and all these lordes wente on. procession at powlus in london / and anone after the kynge and lordes departed / ¶In this yere was a gre¦te affray in fletestrete bytwene men of court and men of the same strete / In whiche affray the quenes attorney was slayne.