Prolicionycion [sic]

¶ Capitulum 26

THis yere of our lord a thousand four honderd & fyfty was the grete grace of the Iubilee at Rome / where was greete pardonne / in soo moche that from alle places of Crystendome gre¦te multitude of peple resorted theder / ¶This yere Syre thomas cryell was ouerthrowen at fermygny and many Englysshemen slayne and taken prysonners / ¶This same yere was a grete assemblyng and gaderyng to geder of the Comons of kente in greete nombre / and made an Insurrection and rebellyd ageynste the kynge and his lawes And ordeyned hem a Capytayne cal∣lyd Iohan Cade an Irysshe man / whiche named hym self mor¦tymer Cosyn to the ducke of yorke / And this Capytayne helde these men to geder and made ordenaunces among them & brought hem to blackheth where he made a bylle of petycions to the kyng and hys counseyll / and shewyd what Inyuryes and oppressions the poure comyns suffryd / and alle vnder coloure for to come to his aboue / And he had a grete multitude of peple / And the seuē∣tenth day of Iuyn the kynge with many lordes Capytayns and men of warre wente towarde hym to the blackheth / And whan the capytayne of kente vnderstode the comyng of the kynge with so grete a puyssaūce / he withdrewe hym with his peple to seuenok

a lytil vyllage / ¶ And xxviij daye of Iuyn beynge with drawen and goon / the kynge cam with his armye sette in ordre and enbataylled to the blackheth / and by aduys of his counseyll sente sir vmfrey stafford knyght. and william stafford Squrer two valyaunt Capytains with certayne peple to fight with the capytayne and to take hym / ¶ and brynge hym and his accessaryes to the kynge. whiche wente to seuenock / and there the Capytayne with his felauship mett with hem / and fought ayēst hem / and in conclusion slewe them bothe and as many as abode / and wolde not yelde hem nor flee / Duryng these scarmuche fyll a grete varyaunce among the lordes men and comyn peple beyng on blackheth ageynst theyr lordes and capytayns sayyng playn¦ly that they wolde goo to the capytayne of kente to assyste and helpe hym / but yf they myghte haue execucion on the traytours / beyng aboute the kyng / wherto the kyng sayd nay /

¶ And they sayd playnly that the lord saye tresorer of eng / lond the Bisshop of Salysbury / / the abbot of gloucetre / danyel andtreuylyan and many moo were traytours / and worthy to be ded / wherfor for to plese the lordes meyne and also somme of the kynges hows the lord saye was arestyd and sente to the Toure / of london / And thenne the kynge herynge tydynges of the dethe and ouerthrowynge of the staffords withdrewe hym to london / and fro thennes to kyllyng worth for the kyng ne the lordes dur¦ste not truste theyr owne houshold meyne / Thenne after that the Capytayne had hadde this vyctory vpon the staffordes / anone be toke sire vmfrayes salade and his brygantyns smyten ful of gylt nayles / and also his gylt spores & arayed hym lyke a lord and a Capytayne / and resorted with al his meyne / and also mo than he had to fore to the blackheth ageyne / to whome cam tharchebis∣shop of Caunterbury / and the duck of Bokyngham to the blac∣heth and spake with hym / And as it was sayde they fonde hym wytty in his talkyng and his requestys / and so they departed And the thyrdde daye of Iuyll he cam and entryd in to london with alle his peple / and there dyde make cryes in the kynges na¦me and his that no man shold robbe ne take noo mannes good / but yf he payd for it / and cam rydynge thurgh the Cyte in grete pryde / and smote his swerde vpon / london stone in Canwyckstre∣te / and he beyng in the Cyte sente to the tour for to haue the lord saye / and soo they fette hym and brought hym to the guyldhalle before the mayer and Aldermen / where he was examyned / and

he sayd he wold and ought to be Iuged by his peres / And the comons of kent toke hym by force from the mayer and offycers that kepte hym / and toke hym to a pryeste to shryue hym / And ••r he myght be half shryuen they brought hym to the standard in Chepe / And there smote of his hede / on whoos soule god haue mercy Amen. And thus deyde the lord saye tresorer of Englond After this they sette his heede on a spere / and bare it aboute in the Cyte / And the same day at myle ende crowmer was byheded And the same day byfore at after none the capytayne with certa∣yne of his mayne wente to phelyp malpas hows / and robbyd hym and toke awaye moche goode. And fro thennes he wente to saynt margrete patyns to one gherstys hows / and robbyd hym also. At whiche robbyng dyuerce men of london of theyr neygh∣bours were at it / and toke part with them / For this robbyng the peples hertes fyll from hym / and euery thryfty man was aferd for to be seruyd in lyke wyse. For ther was many a man in lon∣don that awayted / and wolde feyne haue seen a comyn robberye / whiche god forbede / For it is to suppose yf he hadde not robbed / he myght haue gon f••r er he had bee withstonde / For the kynge and alle the lordes of the Royame were departed excepte the lord sca∣les that kepte the toure / And the fyfthe day of Iuyll he dyde do smyte of a mans heede in Southwerke / And the nyght after the mayre of london the aldermen and the Comons of the Cyte con¦cluded to dryue awey the Capytayne and his hooste / and sente to the lord scales to the tour and to mathew gogh̄ a Capytayne of normandye that they wolde that nyghte assaylle the Capytayne with them of kente / And so they dyde and cam to london brydge in to Southwerke / er the Capytayne had ony knowlege therof And they fought with them that kepte the brydge / And the kē∣tysshmen wente to harnoys and cam to the brydge and shot and fought with hem / and gate the brydge / and made them of london to flee / and slowe many of hem. And this endured all the nyght to & fro tyll nyne of the clock on the morne / And atte laste they brent the drawebrydge· where many of them of london were drou¦ned / In which nyght Sutton an alderman was slayne / Rogyer heysaunt and mathew gogh̄ and many other / ¶ And after this the chaunceler of Englond sente to the Capytayne a pardone ge∣neral for him and another for alle his meyne / And thenne they departed from southwerke euery man home to his hows /

¶ And whanne they were al departed and goone / ther were

proclamaciones made in kente / southsex / and in other places / that what man coude take the capytayne quyck or deede shold ha¦ue a thousande marck / And after this one Alysaunder Iden a squyer of kente toke hym in a gardyn in southsex / and in the ta∣kynge the capytayne Iohan cade was slayne / and after byheded and his heede sette on london brydge / / And anone after thenne the kynge cam in to kente / and dyde his Iustyces sytte at caunter¦bury and enquyre who were accessaryes and chyef cause of this Insurrection / And ther were eyght men Iuged to deth in one day and in other places moo / And fro thennes the kyng wente in to southsex / and in to the weste countre / where a lytell byfore was slayne the bisshop of Salysbury / And this same yere were so ma¦ny Iuged to deth that thre and twenty hedes stode on london brid∣ge attones /