Prolicionycion [sic]

¶ Capitulum 22

IN this yere dame Elyanore Cobham duchesse of gloucetre / was arestyd for certayne poyntes of treasonne leyd ageyn her / wherupon she was examyned in saynt steuens chapel at west mynstre byfore tharchebisshop of Caunterbury / and ther she was enioyned to open penaunce for to goo thurgh chepe berynge a ••a∣per in her honde / and after to perpetuel prison in to the Ile of man vnder the kepynge of sir thomas stanley / ¶ Also that sa∣me tyme was arestyd mayster thomas southwel a chanō of W••st¦mynstre mayster Iohn hum a chappellayn of the sayd ladyes / mayster Rogyer bolyngbroke a Clerk vsynge nygromancye /

¶And one margery Iurdemayn callyd the wytche of eye ••••syde westmynstre / These were arestyd as for beyng of counseyll with the sayd duchesse of gloucetre. And as for mayster thomas south wel he deyde in the toure the nyght before he shold haue be reyned on the morne / For soo he sayd hym self that he shold dye in his bedde and not by Iustyce / ¶ And in the yere twenty mayster Iohan hum and mayster Rogyer Bolyngbrooke were brought to the guydhalle in london / and ther byfore the mayer / the lordes and chyef Iustyce of Englond were rayned and dampned to be drawen hanged and quartred. but mayster Iohn hum had his chartre and was pardoned by the kynge. but mays¦ter Rogyer was drawen to Tyburne / where he confessyd that he yde gyltles and neuer had trespaced in that he deyd fore /

Notwithstandyng he was hanged heded and quartred / on whos soule god haue mercy / And margery Iurdemayne was brente in Smythfeld / ¶ Also this yere the lord Talbotte had leyde syege to dyepe / but the Dolphyn rescowed it / and wan the bastyle that Englysshmen had made ¶Also this yere was a greete effraye in fletestrete by nyghtes tyme bytwene men of Courte and men of london / and dyuerse men slayne and somme hurte / and one herbotel was chyef cause of the mysgouernaunce and effraye / ¶ Also this yere at the chesyng of the mayer of london the Comons named Robert Clopton and Rawlyn ho∣lond Taylour / And the Aldermen toke Robert clopton & brought hym at the ryght honde of the mayer / as the customme is / And thenne certeyne tayllours and hande crafty men cryed nay naye not this man / but rawlyn holonde / wherfor the mayer that was padysley sente tho that soo cryed to newgate / where they a∣bode a grete while and were punysshed / ¶ In this yere were dyuerse ambassadours sente in to Guyan for a maryage for the kynge for the erles doughter of Armynak· whiche was concluded / but by the mene of therle of Suffolk it was lette & put a part / And after this the sayd erle of Suffolk wente ouer the see in to Fraunce / / And there treated the maryage bytwene the kynge of Englond and margarete the kynges doughter of Secyle and of Ierusalem ¶ And the next yere it was conclu¦ded fully that maryage / by whiche maryage the kynge shold de∣lyuer to her fader the Duchye of Anges. and the Erldome of mayne whiche was the keye of normandye /

¶Thenne departed the Erle of Suffolke with his wyf and dy¦uerse lordes and knyghtes in the moost ryal astate that myghte be oute of Englonde with newe chares and palfrayes / whiche wente thurgh chepe / and soo wente ouer the see / and resseyued her / and syth brought her in the lente after to hampton / where she landed and was ryally resseyued / And on Candelmasse euen byfore by a greete tempeste of thonder and lyghtnyng at after None / Paulus Steple was sette a fyre on the myddes of the shafte in the tymbre / whiche was quenchyd by force of la¦boure / and specially by the laboure of the morowe masse preeste of the bowe in chepe / whiche was thought Inpossyble / sauf only the grace of god / ¶This yere was the erle of stafford made and create Duke of Bokyngham / the Erle of warwyck / Duk

of warwyck / therle of dorsete / marquys of dorsete / and the erle of suffolk was made marquys of suffolk /