Prolicionycion [sic]

¶ Capitulum 21

IN the xvj yere of kyng harry deyde Sygysmūd Emperour of almayne and knyght of the garter / whos terment the kynge kepte at pawlys in london ryally / where was made a ry∣al herse / and the kynge in his astate cladd in blewe was at euen at dirige / and on the morne at masse / And after hym was elect & chosen Albert duke of ostryche whiche had wedded Sygys∣mundus doughter for to be Emperour / This was taken and res∣seyued to be kyng of boheme & vngary by cause of hys wyf that was sigismundus doughter whiche lefte after hym none other he yer This albert was emperour but one yere / for he was poysond and soo he deyde / somme saye he deyde of a flyxe / but he was a ver¦tuouse man and pytefulle / soo moche that alle the peple that knewe hym sayde that the worlde was not worthy to haue hys presence / In this yere was the kynge of scottys murthred in his chambre by nyght pytously whiche kynge had be prysoner xv ye¦re in englonde / And they that slewe hym were taken afterward & had cruel iustyce / this yere one owayn a squyer of wales a mā of lowe byrthe / whiche had many a day to fore secretely weddyd quene katheryn & had by her thre sones / & a doughter was taken

and commaunded to newgate to prysonne by my lord of glouce∣tre protectour of the Royame / And this yere he brake pryson by the mene of a preest that was his chappelayn / and after he was taken ageyne by my lord bemond / and brought ageyne to newe gate / whiche afterward was delyuerd at large / and one of his sones afterward was made Erle of rychemōd / & another erle of penbroke / and the thyrde a monk of westmynstre / whiche monke deyde sone after / This yere also on newyersday at baynardyscas∣tel fyl̄ doune a stak of wode sodeynly at after none / and slewe thre men mesch yuously and foule hurte other / Also at bedford on a shyreday were eyghten men murthred / withoute stroke by fallynge doune of a steyr / as they cam oute of theyr comyn halle and many foul̄e hurte / In the eyghtenth yere sir rychard beau∣champ the good erle of warwyck deyde at Roan / he beynge that tyme lyeutenaunt of the kynge in normandye / and from thennes his bodye was brought to warwyk / where he lyeth worshipfully in a newe chapel on the south syde of the quyre / ¶ Also this yere was a greete derthe of Corne in al englond / For a busshel of whete was worth fourty pens in many places of Englond / & yet men myght not haue ynowgh / wherfor steuen broun that ty∣me mayer of london sente in to pruse / and brought to london cer∣tayne shippes laden with rye / which easyd and dyd moche good to the peple / For corne was soo skarce in Englond that in some places of englond poure peple made hem brede of fern rotes / This yere the general counseyle of basyle deposed pope eugenye And they chese felyx whiche was duc of sauoye / And thenne byganne the scysme / whiche endured vnto the yere of our lord a MCCCC & xlviij / This felyx was a deuoute prynce / and sa∣we the sones of his sones / and after lyued a deuoute and hooly lyf / And was chosen pope by the counseyllr of basyle / eugenye de¦posed / and soo the scysme was long tyme / and this felyx had not moche obedyence bycause of the neutralyte / for the moost parte and wel nygh al cristendom obeyed & reputed eugenye for veray pope / god knoweth who was the veray pope of them both / for both occupyed durynge the lyf of eugenye / This yere Syr Rychard wiche vycary of hermettesworth was degrated of his prysthode / at powlys / and brente at toure hylle as for an heretyk on saynt Botulphus day / how well at his deth / he deyde a good cristen man wherfore after his dethe moche people cam to the place / where he hadde be brente / and offryd and made a heep••

of stones / and sette vp a crosse of tree and helde hym for a saynt till the mayer and shreues by commaundement of the kynge and bisshops destroyed it / and made there a donghyll. Also this same yere the shreues of london fette oute of saynt martyns the graūte the sayntuarye fyue personnes / whiche afterward were restored ageyne to the sayntuarye by the kynges Iustyces / After Alberte the thyrde Frederyk was chosen Emperour / This Frederyk duke of ostryche was longe Emperour / and differyd for to be crowned at Rome by cause of the scysme / but after that vnyon was had he was crowned with Imperyal dyademe with grete glorye and tryumphe of pope nycholas the fourth / This was a man pesyble quyete and of synguler pacyence / not hatyng the chirche· he wed∣ded the kyng of portyngales doughter /