Capitulum xiij
AFter kynge Harry the fourth regned harry his sonne bor¦ne at monmouthe in walys / This Harry whiche was the fyfth harry after the Conquest was a noble and wyse man / For after his faders deth whanne he hadde take vpon hym to be kynge / he chaunged al his Condicions and was sodeynly chaū∣ged and lefte al his old wyld maners and charged alle them / that had ben conuersaunt in his wylde lyuynge that they shold auoyde his presence and come no more therynne /
This man dyde many greete thynges in his dayes / and regned not fully ten yere / For in the tenth yere of his regne and syx & thyrtty yere of his age he deyde / and is buryed worshipfully at westmynstre / In his fyrst yere anone after he was crowned / whiche was the nynthe day of Apryll / He sente to the Frerys at langley where the body of kyng Rychard the second was buried and lete the body take oute of therth ageyne and dyde do bryng it to westmynstre in a Ryal chare couerd with black veluet and baners of dyuerse armes about / And alle the horses in the chare were couerd with blac / and beten with dyuerse Armes / and ma¦ny a torche brennyng by the chaar till they cam to westmynstre / And there he lete make a ryall terment and buryed hym by que¦ne Anne his wyf as his desyre was / Aboute whoos sepulcre ther stande foure grete tapers contynuelly brennynge / And one day in the weke perpetuelly he hath a Dirige with nyne lessons And on the morne a masse / bothe by note solempnly on whiche day is gyuen also wekely in pens to poure peple enleuen schyl∣lynges / & viij d / all ordeyned by this kyng vpon grete payne / And on the day of his annyuersary is yerly gyuen twenty pond in pens to pour peple / ¶ Also this kynge ordeyned by his lyf and founded the chartrous at Shene / And the hous of