Prolicionycion [sic]

¶Capitulum 7

THis yere whan the counseyll was made in the cyte turon in gallia / in fraunce pope vrban exyted nygh al the west lon¦des to socour of the holy lande / therfor the thyrd henry emperour Reymund erle of saynt Gyles and beamund of apulca toke the crosse and passed the see of myddel erthe at that place that is cal¦lyd saynt georges arme and had with hem two honderd thousād of Crystē men / & so the holy lond was wonne at that tyme & cry¦stes spere was founde by reuelacion of saynt andrew that was shewed to a clerke / with hem wente Robert duc of normandy & therfor he made acorde with his broder kynge william the reede & leyde to hym normandy to wedde for ten thousande pounde / But be cause therof kyng wylliā toke a greuo{us} trybute of englisshmen

so that prelates melted theyr vessel / and lordes spoylde their sub¦gettes / Malcolyn kyng of Scotland toke prayes in northumber¦lond / therfore kynge william and his broder Robert wente in to Scotlande / his nauey was nygh al adreynt & his hoost marryd with ••old and with honger. Malcolyn cam ayenst hym with ade¦lyng and made pees by medyacion / Soo that malcolyn sholde be obedyente to kyng william / as he was somtyme to his fader / and kyng william shold yeue hym euery yere twelue mark of golde and he sholde yelde hym twelue cytees / in englond / but sone ther after the kyng fayled and Robert toke with hym edgar & went ageyne in to normandy / ¶ This yere the fyfte day of October a grete strook of lyghtnyng smote the chirche toure at wynchecom be and thyrled the walle and threwe the crucifyxe hede doune to the erthe and brake the ryght thygh and threwe downe our lady ymage that stode by the roode / therafter cam a stynkynge smoke that fylled all the chirche / and dured till the monkes hadde goo a procession aboute all the places and offyces of the abbay with hooly water and relykes of hooly sayntes and with the Letanye

Also at london a whyrle wynde threwe doune six honderd hou¦ses or moo / and many chirches therto / and slewe two men in seint marye chirche atte bowe / and lyfte vp sixe reftres of the chirche / and stroke theym soo deepe in the grounde / that vnnethe the sixte part of hem was seen aboue the erth / ¶ Also a whyrlwynde threwe doune the heelyng of the chirche of Salesbury / the fyfth day after that osmundus had halowed that chirche / ¶ Willelmus de pon / libro quarto / ¶ Remigius the Bisshop that translated the see from Dorchestre to lyncolne / cast for to ha∣lowe the chirche that he had newely buylde / But thomas bisshop of york wythstode hym and sayde / that that place was of his pa∣rysshe / And kyng wylliam for money that Remigius hadde yeuen pryuely commaunded nyghe alle the bisshops of Englonde that they sholde come to that dedycacion the fyftenth day of may / but twey dayes byfore that daye of the dedycacion Remygyus dyed by goddes preuy doome / Robert Bisshop of herford aloone wolde not come to the halowyng of that chirche / for he knew by certayn syght of the steres that that chirche shold not be halowed in Re¦mygius tyme / This Remygius semed nygh a wonder forbodyng for his bodye was soo lytel / but he ouercome kynde and shewed outeward a noble hert and wytte / Soo that gracious and noble vertue come of that litel body / After this Remigius Robert bloet

was Bysshop a full lecherous man / he fulfylled ryally the halo∣wyng of that chirche / Atlast at wodestok he wēte from the kyng & deyde and his bowels were take oute of his bodye & beryed in the abbay of euesham that he hadde founded / the other dele was buryed at lyncolne / there it was well knowe that the wardeyns of the place were ofte dysesed with shadowes by nyghte / till that the place was clensyd with hooly prayers and be dys / That ye∣re kyng william wente in to northumberlonde / and repayred the cyte of lugubalia / that now is called caercol and made a Castell therynne / that cyte hadde ben destroyed from the comynge of the danes two honderd yere / ¶And sone therafter at gloucestre the kynge was take with a grete sekenesse and byhete that he wolde amende his lyf by counseyll of the lordes / ¶ Henricus libro sexto ¶And he yaf that yere the Archebisshopryche to Ancelm / but he myght not take therof but as the kyng wold / er the tribute was payd that the kyng had sette / Also he sayde that the Bisshopriche of lyncolne longed to the See of york / till that Robert bloet had yeue the kynge fyue thousand marc / ¶Also this yere deyde Ro∣gyer erle of shrowesbury / whanne he lay seke he made hym mōk for to haue somme socoure by assente of countesse Adelysa / for he hadde sente Reynald pryour of shrowesbury to cluny for to haue saynt Hughe / the abbots kyrtel to were it aboute hym / Treuisa ¶A wyseman wold mene that erle Rogyer had as moche mede of that he was monke / as malkyn of her maydenhode / that noo man wolde haue and not adeel more / Thenne it foloweth in the story / after Rogyer his sonne hugh was erle / ¶ Also that ye∣re was grete reyne and flodes / And soone therafter soo grete fro••t that one myghte ouer all lede cartes and waynes ouer waters & ryuers / And whanne the frost byganne to. thawe and to melte it brake nygh al the bridges in euery syde / Rees kyng of wales was slayne in fyghtynge faste by brechnok / and soo ceesed the kyngdome of wales / ¶ Malcolin kyng of Scottes come to gloucestre ayenst king williā on a saynt barnabas daye / to acorde with him / But they departed in wrath / for king william wolde that malcolin shold be demed in his court where euer it were in Englond / But malcolin wolde not but in the marches of bothe the kingdoms there it was wonte / but that yere vppon saint bri∣cius daye malcolin and his eldest sonne edward and many other were slaine in northumberlond of Erle Robartes knightes / mar¦grete quene of Scottes that loued and worshiped god with her

myght / toke soo grete sorowe that she fyll seke as she had prayd god and deyde the thyrde day therafter / whanne she was dede / the Scottes made dunwald malcolyns broder kynge / But duncan malcolyns sonne by helpe of kyng wylliam put oute dunwalde and toke the kyngd••me of Scotland / ¶Willelmus de pontifici∣bus / it was tolde this malc••lyn in a tyme that one of the lordes of his londe hadde conspyred to brynge him to deth / he badde hym be stylle that tolde hym that tale and he helde it preuy with hym self tyll the traytour was comen / Atte laste the traytoure cam to the kynge to awayte his tyme to doo that cursed dede / the kynge bad erly in a mornyng that all the hunters shold come with their houndes / ¶ Whyle they were an huntynge the kynge wente with this traytoure to a broode pleyne / that was bysette with thykk wode al aboute as a garland / In the myddel of that pla∣ce was a lytell toote as it were an hylle / these tweyne stode alone on that toote / loo sayd the kyng / I and thou ben here alone / eche wel y horsed and wepened· and eche well arrayed / Now is noo man that seeth vs that myght helpe other lette / yf thou myght & yf thou darrest doo now as thou haddest thought / I can not see whan it myghte be better nother more frely done / yf thou hast or∣deyned venym that is the doyng of wymmen and not of knygh∣tes / yf thou desyrest my wyf soo may spouse brekers / yf thou cas∣test to stele vpon me with 〈◊〉〈◊〉 that is a theues doyng & not a knyghtes / Therfor do 〈◊〉〈◊〉 and as a knyght shold / that thy tresonne he withoute shame of cowardyse for withoute fals∣heede may it not be / Anone he fylle doune to the kynges feet and swore tha he wolde therafter be trewe to the kyng to his liues ende & promysed hym pledgys whiche he wolde cheese / And soo the traytour was made trewe and wente ageyne to his felawes whanne he sawe his tyme / Also this yere Ancelm abbot of bar¦ro cam oute of normandy in to Englond atte request of hugh er∣le of chestre for thre causes / one bycause he shulde releue abbayes that he hadde byfore founded in englond of greuous trybute that the abbayes payed to the kyng / the second for to visyte erle hugh that was sore seke that tyme / The thyrdde by cause he sholde foūde an abbaye at chestre / In that place he assygned his preeste Ry¦chard fyrste abbot and chaunged seculer chanons in to monkes But in the comyng ageyne thennes he was made Archebisshop of Caunterbury /