Prolicionycion [sic]

¶ Capitulum 43 /

THis yere aboute mychelmasse the Quene of englond & her sonne edward and Rogyer mortymer that escaped oute of the tour of london cam in to englond with lytel strengthe of He∣newers and londed in estsex and wente toward london / there the kyng was that tyme / and wonder it was that the lond was still all aboute withoute noyse and shedyng of blood / And the kyng fledde oute of london in to west wales and they folowyd hym ea¦syly a foote pas / That tyme the morow after of saynt Calyxtes daye by counseylle of the bourgeys of london the kynges tresorer bisshop of excetre was heded withoute the north dore of saynt pou¦les chirche / And in the morowe the toure of london was take by bourgeys of london in helpe of the quene and of hyr sonne / Sone therafter on saynt Symons euen and Iude the quene and her men toke the castel of Brystow / there hugh the spenser the elder was hanged and drawen and his heede sente to wynchestre / The same yere on saynt hughes day the erle of Arundell was ta¦ke in· the countray of shrowesbury / but he was heded at Herford

The same weke the kynge of englond was take in the Castel of neth in west wales / & putte in warde in the castel of kenelworth ¶ Hugh the spencer the yonger was take with the kynge and drawen / at herford byheded and quartred / & his hede was sent to london bridge Also that yere in the octaues of twelue day was made a parlement at london / there by comyn ordenaunce were so∣lempne messagers sente to the kyng that was in prysonne / Thre Bisshops / Thre Erles / Twey Barons / twey Abbottes / Twey Iustyces for to resygne to the kynge that was than in war¦de the hommage that was made to hym somtyme / For they wol∣de no lenger haue hym for theyr lord / One of hem syre william trussel / knyght and procuratour of alle the parlemente spake to the kyng in name of all the other and sayde these wordes / ¶ I william trussel in name of all men of the lond of englond and of alle the parlement procuratour / I resygne to the edwarde the ho∣mage that was made to the somtyme / And from this tyme forth¦ward I dyffye the / and pryue the of all Ryall power / and I shal neuer be tendaunt to the as for kynge after this tyme / Also this was openly cryed at london / The same yere on Candel∣masse euen / edward the kynges sonne was made knyght /