Prolicionycion [sic]

¶ Capitulum 37

THis yere fylle stryf bytwene the kynge and the lordes of Englond for the kynge wolde not holde the ordenaunces / that were ordeyned at parleament at ••xenford / Aboute saynt Iohns f••ste the natyuyte the lordes helde in warde the bisshop of herford the pryour of wenlok and other prelates that were alye∣nes / other that were next the kyng they chased oute of Englond and occupyed theyr goodes and catayll / therfore henry putte the vniuersyte oute of oxenford / At last the kynge and the barons put hem self touchyng the articles in the ordenaunce of the kyng of Fraunce / and he repreued these articules euerychone / but the lordes of Englond forsoke his vnskylfull dome and stode forth as they had bigōne / than lordes that maintened these ordenaūces

cam to geders at lewys in southsex the / xiiij day of may / and yaf a batayle and toke kyng henry and his broder Rychard duck of Cornewayle / and edward kyng henryes eldest sonne and many other grete / And soo they compellyd the kyng to holde these orde∣denaūces that they had made and helde edward eyght monethes at herford in warde / That tyme the prouynce of Chestre was ye∣uen to Symon of montford erle of leycetre in the Trynyte euen / The kynges sonne Edward of herford escaped oute of warde by help of Syr Rogyer mortymer / for he had leue by cause of solace to prycke a courser and so he escaped vnto the hylle Dūnemore / there he sawe this Rogyer mortymers baner displayd / Herafter aboute lammasse was an hard bataylle at Euesham bytwene the kynge and the barons / there by gyleful withdrawyng of the Erle of gloucestre that helde with Symon byfore / This rightful Symon was dede / and many other noble personnes / Of him grete fame tellith that he dyde many myracles / but they were not shewed for drede of the kynge / Thenne Symons knyghtes helde the Castel of kenelworth half a yere ageynst the hoost of all en∣glonde / After vrban the fourth Clement was Pope as it were four yere / After hym the Popes see voyded thre yere and twey monethes / This Clement had fyrst wyf and children / and was afterwarde aduocate and cheef of Counseyls with the kynge of Fraunce / whanne his wyf was dede he was made bisshop of pue and than Archebisshop of narbon and than bisshop of Sabyn / & Cardynal and legate sente in to Englond / there whyle he was absente he was chosen Pope / therafter as men trowyd with his mylde lyuynge and hooly bedes he aqueynt many trybulacions of hooly chirche / Also whanne Conradynus wente in to Scicile to werre ageynst charles / this pope told openly in a sermon. that cōradin{us} dede shold come to nought / That yere aboute all halowē tyde Octobon the legate cam in to englond & ordeyned many thyn¦ges for the prouffyte of hooly chirche / By his counseylle kynge henry graunted that they must raunsonne her landes that were dysheryted for the arisyng ayenst the kyng oute take the Erle of derby Robert de ferrer for it semed that he hadde moost greued the kyng ¶ than the next yere therafter he greued the kyng / & was taken and diherited till he / other his heyres / other somme who for hym myghte pay on a daye / l / M / pounde / At London octobon the legate denounsed the londoners and the portnens acursyd / and sayde that they were acursyd in pope Clements counseyll and he

enterdyted hem and forbode hem the conpany of Crysten men / Thenne he suspended the bisshops of london and of Chycestre of her offyce till they were assoylled of the pope / therfore the london∣ners besyeged octobon in the toure of london till many bisshops ar¦med had hym aweye / This octobon toke dymes of hooly chirche for thre yere whyle he was in englond and so he wente hi•• weye and of a deken Cardinal he was made Pope / That yere the sou∣dan of Babylon destroyed ermonye and toke antyo••he and slewe the men that dwellid therinne and destroyed the noble cyte / Kyng henry laye with his hoost withoute london at stratford til that pees was made bytwene hym and the barons / Octobon wē¦te oute of englond with huge tresour / And edward the kynges sonne and many other toke the sygne of the crosse / Pope Clemēt deyd / And saynt edward kyng and confessour is translated the fourthe daye of october in kynge henryes tyme / And kyng henry had the twentyest peny of lewd mennes catayl & the dymes of ho¦ly chirche for thre yere by assente of the Pope / This yere edward the kynges eldest sonne and his wyf / wente to the hooly land / After Clement the tenthe gregory was pope four yere / the thyrd yere of his poperyche he made a counseyl at lugdnum for the pro¦fyte of the hooly lande / For he caste to wende theder in his owne person / In that counseyll were messagers of the Tartres and of the grekes / the grekes promysed that they wolde come ageyne to the vnyte of hooly chirche / there were syx honderd bisshops and a thousand prelates / therfor one sayde / gregorius denus congre∣gat omne genus / he wolde by these versus mene that the tenthe gregory gadered al manere men / there was ordeyned that noble statute that neuer was herde afore that alle personnes with cure sholde be preestes after that tyme / And that after that tyme noo man sholde haue leue to assigne his tethynges as he dyd byfore at his owne wylle / but al tethynge sholde be payed to the moder chirche / ¶Also this gregory charged hooly chirche with dymes for six yere / he dampned pluralyte of benefyces with cure / Also he approued somme states of the ordres of beggers as prechours & menours and somme he suffryd as Carmes and austyns / and somme he reproued as sacfreres / that were callyd de penitencia / and de valle viridi and other suche ¶ Also this yere deyd henry kyng of englond on saynt edmondes day of Pon∣tenay / & men trowyd that skylfully he ended his lyf in his day for he had trauayled hym wrōgfully whyle he was alyue / he had

regned fyue an•• fyfty yere / Also this yere dyed bonefas archebis¦hop of caunterbury / and the pryour of Caunterbury was chosen archebisshop / but the pope forbadde that election and made Ar∣chebisshop Frere Robert of kylwerby of the ordre of prechours & mayster of dyuynyte / ¶Among his other noble wrytynges he made noble wrytynge vpon precian / and vpon logyk / Sone her¦after lowys kyng of Fraunce and his twey sones the kynge of nauern and many prelates wente efte to the hooly lond / But by greete sekenesse and euyll••. that was stronge in the see costes of that land / The Crysten hoost that was of two honderd thousand was disparpled and to shed / for the popes legate that was ruler of pylgryms in the hooly lande dyed and the kyng of Fraunce also / This kyng while he laye seke prayd besyly in this maner / Lord I pray that thou make vs despyse the welth of this world and drede none of his meschyefs / And for the peple he prayd in this maner be thou lord to thyn own peple ha••ower and wardeyn And he putte to at the ende I shal entre in to thyn hows / and I shall pray to thyne hooly temple /