Prolicionycion [sic]

¶ Capitulum 26▪

AFter Clement the thyrdde Celestinus was Pope syxe yer•• and eyght monethes / the seconde day of his consecracion he crowned the fyfth henry Emperour Frederycks sonne / In this maner / Fyrst byfore the grees of the chirche of Rome he toke ••n oth of this henry that he shold defende and mayntene holy chirch and the ryghtes of hooly chirches / and yf ought were bynome o•• saynt peters londes he shold restore it ageyne / with al his myg••t Thenne he saate in his chayr / and helde the Emperours crowne with his feete and the emperour bowyd doune his heede / and the pope leete falle the crowne vppon the Emperours heede / and smo¦te it of ageyne of the Emperours heede anone with his feete / in token that the pope hath power to make the emperour and to sette hym doune yf he be worthy / The Cardynals stoode by and toke vp the crowne and sette it vpon the Emperours heede ageyne / Whyle the kyng was absent the forsayd wylliam de longchamp Bisshop of hely pryued hugh bisshop of durham of all manere worship / and greuyd the Bisshop of wynchestre / and wrethyd neygh alle / In the mene tyme / many were arayd for to passe the see to haue and axe remedye of the kynge and helpe ageynste the comyn tyraunte / but he was waare th••rof and come before all o∣ther / and had al his wyll and come ageyne er other men come to the kyng / but other men had lettres also suche as they wold and one of hem that was bisshop of lyncolne cam ageyne and pursu¦ed william bisshop of hely vn to lyncolne / There was sette a daye to answere in the castel of tykhylle / there whanne the bisshop of durham was come / this william spake to hym and sayde / / I ta¦ke the bisshop not a bisshop / but I chaunceler take the Castellan till that thou yeue pledges to yelde vp the kynges Castels / The

fame of this euyl man william fulfylled al englond / Soo that the grete grutchyd ageynst hym and the smale cursed wel fast / The kynges broder Iohan was wroth for the takyng of his bro¦der Geffrey erle of york / and gadred grete strengthe of his owne prouynce and of walsshemen with many bisshops / and chaced this william from wyndesore to the toure of london / and from thennes to douer / there this william dradd left he shold not freely passe the see and toke a womans cloth aboue his owne clothyng and coueryd his hede and the moost part of his face with kerche¦ues and wymples and walked on the clyf / and bare on his lift arme a webbe of lynnē cloth as it were to sellyng and bare a me∣te yerde in his ryght hande / for he wold slyly escape and passe by that crafte and not be espyed / But by cause he couth not selle and vndo his cloth as a woman shold he was take by his pryuy mē¦bris & despytously espyed / but at last he passed the see / and the bisshop of Rothomage had the reulyng of the Royamme by cō∣maundemente of the kyng that was than in Scicilia / Also the bisshop of bathe was choce Archebisshop / but he was so∣ne deed / and yet william bisshop of hely purchaced a wel stron∣ge maundement of Celestinus the pope / and had the same Auc∣toryte and power that he had rather as it were for amendemence of the kyngdome of englond / and for to wythstōde Iohan that wold byneme his broder the kyngdom whyle he was absent But in al this he was begyled for he conspyred and was assen¦tynge to Iohan other for yeftes other for fayr byhestes / And yet al for nought for though he shewed at douer the grete waraūt of his legacye / yet the quene Elyanor and the Archebisshops of Rothomage and of yorke / and many other compellyd hym for to sayle ageyne. thenne after that they had abyde spryngynge ty¦me at Turon the kynges of Frannce and of Englond wente / the one by water and the other by land and come to Scicilia / There the kyng of Fraunce lete passe the trespaas of his men vn¦punysshed and was cleped a lambe / but the kyng of Englond l••te no trespaas vnpunysshed / therfor he was cleped a lyon / Also kynge Rychard fought with griffons in Calabria / and in Scicilia / and had the maystrye / He made a Castel of tree to bee ladde aboute and he rered that Castel ageynst the cyte of messā and cleped that Castel mategryffons / with that castel afterward he toke the cyte of Acres / Also there his moder brought hym a fayre mayde of speche and of shap Berengaria that was the

kynges doughter of nauarn / and kyng rychard wedded her to wyf / Than the kyng of fraūce wēt forth in to siria / & the kyng of Englond abode somwhat after that he w••s goon / but in that aby¦dyng he was not ydel· but he sente forth vytayls & made engyns Than he went oute of Scicile and come in to Cypres & bythouht hym that tweyne of the kynges shippes were broke with tempest of the see and spoylled by men of Cypres / therfor kyng rychard chaced the kyng of the londe that wold not doo amendes / from Cyte to Cyte till that the kynge yelded hym to kyng Rychard / And the kyng yelde hym self vpon couenaunt that he shold not be put in boundes of yren / kynge Rychard graunted hym / but he putte hym in boundes of syluer and dwellyd there twey mone∣thes / and had the lande at his wyll / than he wente to acres and toke in the see one of the soudans greete shippes lade with greete ryches / and bulgyd and thyrled it in the nether syde / whanne he come to akres fyl stryf bytwene hym and the kynge of Fraū∣ce in this maner / by couenaunt that was made bytwene him at Turon / The kynge of Fraunce chalengyd half that was wonne in Cypres / kynge rychard ayene sayde & sayde that the couenaūt was made of the wynnyng of the hooly lond and ageynst the sa¦rasyns / Also ther was another cause of stryf for the kyng wol∣de lene nothyng to therle of champayn that was than ful nedy and in grete meschyefs / but he wold laye champayne to the kyng to wedde / than the erle sayde / I haue doone that I shold do heraf¦ter / I shal doo that me nedyth / Myn owne lorde takyth me not but for of myne / therfor I shal goo to hym that is more redy to yeue than to take / Than he cam to kyng rychard / and was ryche y nough / Also kyng Rychard fauoured guy kynge of Ierusa∣lem ageynste Conradus markys kyng of Tyrus that the kyng of fraūce fauoured on that other syde / But they cam to the si••ge of acres that was besyeged two yere & al theyr trauayll lost / For the engyns that were broughte ageynst the cyte were brent with Grekysshe fyer that noo water myght quenche nother other Ele∣ment / ¶Also the Crysten hoost waxed lasse and lasse somdele by sekenes and somdele for other defautes and meschyefs / Also it was to deled in partyes for the stryf that was bytwene guy and the markys / Also somme grete of our syde hadde recey∣ued money and mede of the Soudan