Prolicionycion [sic]

¶ Capitulum 30

AFter kenelm his eme on his faders syde colwulf{us} regned in mercia / but after two yere beornulphus the tyraunt put hym out and regned in his stede two yere / he was on a tyme ouer come at elyndon of Egbertus kyng of westsaxons as it is sayd to fore honde / he meuyd to a iourney ayenst the est angles that had holpen egbertus and was slayn of hem / his successour & his neigh kynnesman ludecan wold aueng his deth & fought ayenst the eest angles & was slayn of hem also / & thre dukes of his / After hym his neyh kynnesman wyglanns regned / xiij / yere / but Egbertus distourbed him ••••ng tyme / After pascal the fourth Eugenius was pope four yere / he sente seynt sebastyans boones to hildewynus abbot of seynt denys / After eugenius valentinus was pore four yere / ¶ In his tyme the childe swy thyne was borne at Wynchestre that dyde myracles there after

hemstans deth After valentinus the fourth gregroy was pope thyrten yere ¶ Giral / d / p / ca / 17 / In this popes tyme the∣odulphus was in his floures / that was fyrst abbot of Floryace and thenne Bisshop of Orleans / he was exyled and was in the Cyte of Angeo by assente of kynge lowys / whanne his enemy∣es had falsely accused hym / thenne it happed on a palmsondaye / that the kynge passyd therforth and he made and songe the verse that bygynneth in this maner Gloria laus tibi sit / and soo forth by the dyte and note of the vers / the kynge was meuyd and de¦lyuerd him and brought hym to his rather grace / That tyme rabanus was in his floures monk and abbot of meldens in Ger¦mania a grete poete and a grete clerke of dyuynyte / That ye∣re the danes spoylled the ylonde of shepeye besyde kente / Therfore kyng egbertus fought ayenst hem at carrum / and was chaced / At Tolouse a damoysel of twelue yere old resseyued our lordes body on esterday and fasted afterward six monethes contiunelly to brede and to water / and absteyned ther after thre yere from all maner mete and drynke / And tourned ag••yn atte last to comyn lyuyng / Also that tyme somme mysdoers of the Romayns sente to the soudan of babylon that he shold come and be lord of ytaly Thenne he come with grete multitude and strengthe and spoylled Rome / and made a stable of seynt peters chirche / ond destroyed Tuscia and secilia / Atte last atte prayer and requyrynge of po¦pe gregory / gy of mercia with his longobardys and lowys with his gālles chaced hem oute of tho londes and countreyes / And they sayled toward affryca and were drowned wel nygh euery chone / That yere deyde helmstan bisshop of wynchestre / And seynt swythyn was bisshop after hym / ¶ The danes with grete nauye londed in a place called cural amonge the westbritons / & made confederacyon with the brytons & wente to gyder / & assayl¦led kynge egbertus londes / W / de / r / li / 2 / Egbertus kyng of west saxons deyde / and his sone athulphus that hete ethelwulfus reg¦ned after him / xxij / yere / This was somtyme take to norysshing to helmstan bisshop of wynchestre / & made hym subdeken / But at¦te last by graūt of leo the pope / he was made kynge & had a wif osburgā that was his owne botelers dought / & gate on her thre noble sones that regned after the fader eueryche in his tyme / He toke with hym the yongest of his sones alured{us} & went to rome / & dwellyd there one yere & repayred there nobly the scole of sax∣ons / that was as it is sayd first ordeined by kynge offa / But

it was brente the last yere to fore hond / Also he sawe there outla lawes and men that dyde open penaunce doo theyr penaunce in y∣ren y bounde / thenne he purchaced of the pope that englysshmen shold neuer after that tyme out of her countrey doo penaunce in bondes / It is sayd that therfor it was that he graunted of euery hows of his royame euery yere a peny to seynt peter / & after that tyme / he sente euery yere in / C / marc to rome / an / C / to seint pe∣ters chirch an C to seynt paulus lyght / & an honderd to the pope Also he delyuerd and quytte all the chirches of his Royamme of al maner kynges trybute / and offred to god the tenth dele of his catel / In his comyng ageyn fro Rome in the twenty yere of his kyngdome he spoused Iudytha / the doughter of charles the bal¦led / and brought her with hym in to englond / And for he sett her in trone bysyde hym ayenst the maner of the kyngdome of westsaxons / his oldest sone aroos ayenst him and many other lordes / So that a grete dele of the kyngdom was take to his oldest sone but yet vnnethe the stryf was ceced / For amonge hem it was v∣sed that the quene shold not haue suche worship / And that for wrath of ethelburga kynge offas doughter / that hadde poysoned her husbonde bryghtrycus / ¶R Also his sone Aluredus hadd an euyl incurable whom he sente in to yrlond to be heeled of seint modwenna / that dwellyd there / And therfor whanne the chirch of modwenna was destroyed in yrlond she cam in to Englond / And the kynge yaf her londe to buylde two abbayes of maydens One in Ardern at pollyswortham that yet dureth / There osytha and athea the maydens dwellyd with seynt edyth kyng Athul∣phus suster / ¶ But modwenna dwellyd somwhat of tyme in the other abbaye of streueshale / thennes she wente thrryes to Ro¦me / And she deyde atte last in the ylond andreseye besides burton after that she was closed seuen yere ¶ That yere the danes slough many men in lyndesaye in eest englond and in kente / ¶That yere deyde wyglaf kynge of mercia the yere of his regne thyrten / and was buryed at Repyndon / he hadde goten wygmū¦dus / and wygmundus had goten wistan the martir / But after w••glaf bertulphus was kynge ouer mercia twelue yere / his so∣ne bertsericus slough seynt wystan cruelly /

¶ Willelmus de Regibus libro secundo /