Prolicionycion [sic]

¶Capitulum 23

THe thyrdde leo with his sone Constantyn was Emperour fyue and twenty yere / In his fyrst yere deyde pipinus Ve¦tulus after that he hadde gouerned the kynges hows eyght and twenty yere / ¶After hym come charles that was bygoten on a Concubyne and heete tutides and marcellus also / And hadde suche names of sledges and hamers / with the whiche smythes beten and temperen grete gaddes of yron. tudes or malleus in la∣tyn is a sledge or an hamer in englysshe This Charles fought nobly ayenst sarasyns that come oute of Affrica and made hem flee in one batayll at peytow· and in another batayll at narbon and chaced hem in to spayne· in the whiche bataylls were slayne four hondred thousand & fyue & sixty thousand of sarasyns / Al¦so he fought ayenst the saxons and ayenst the bauar••es Also ayenst hendo a duc of guyen & ayenst Raufredus duc of angeo Also this charles for besynes of warres and bataylles that fill vpon hym bytoke the goodes of holy chirche to lewdmen. therfore Eucherius bisshop of Orleyans while he laye in his bedes sawe this charles in body and in soule. tormented in helle / The Angel that shewyd that syght to the bisshop sayde that it was bycause he toke the goodes of holy chirch and of poure men / Thenne by war¦nynge of the bisshop the abbot of seynt denys and pipinus preest wente to charles graue and torned the stone / and sawe a greete dragon flee oute of the graue / but ther was no body y founde ¶ Paulus libro septimo That yere at Rome the Ryuer Tiber wex•• so grete and soo huge that the watres that fylle mette and ioyned to geders fro port seynt peter to port Iuilinum / and dured so seuen dayes til the Cyteseyns made a letany / That yere deyde kynge etheldredus after that he hadde be kynge of mercia thyr∣ty yere and monk e of bardony thyrten yere / And he was bury∣ed at lycheselde After him his cosyn ethelbaldus regned that

was pendaes neuewe sone in his broder side / And soo he was the sone of the sone of alwy pendaes broder· And ethelbaldus reg∣ned fourty yere as cuthlacus the confessour hadde sayd This ethelbaldus in the eyghtenthe yere of his kyngdome bysie∣gid Somerton and wanne it and spoylled northumberlond & ouercome the walsshmen / but in the xxxvij yere of his kyngdom he was ouercome of cuthredus kyng of westsaxons / The laste yere of his kyngdome his owne men slowe hym at Secandon Also that yere Colfrydus abbot of girwey deyde at hugon in pil¦gremage Willelmus de pon libro quarto That yere deyd seint Egwinus the thyrdde bisshop of wyccies / ¶ That Bisshopryche is nowe callyd wyrcetre. In a tyme Egwinus bythought hym of the synnes of his yongthe. and gyuyd him self / and threwe the keyes of the gyues in to the Ryuer Auene· And wente gy∣ued openly to Rome· And sayd he shol be syker of the foryeuenes of his synnes / Whan his gyues were vnshyt and vnloken by the vertue of god or ellys by the same keyes· And he wente soo gy∣ued to Rome· And it is sayd that the belles of the cyte bygon∣ne to rynge by hem self in his comynge / he come ageyne with pri¦uelege for his chirche / whyle he saylede in the see of Brytayne a grete fysshe leepe in to his shippe. And in the gutte of that fysshe was founden the keye that vnlokked the gyues Beda libro 5. capitulo sexto Seynt Iohan bisshop of york deyde at deyrwode that is beuerle the yere of his bisshopryche thre and thyrtty / and was buryed in the porche of the minstre. In his fyrst yeres & spe¦cially in lente he dwellyd in seynt mychels chappel at hastugald chirche not f••r fro the tyne in the northe hylle of the same place that hete hernyshowe in Englyssh / But in englysshe that is now vsed hit hete Ernes hille / And he deyde atte last atte Beuerley that is four and twenty myle oute of yorke estward. And that place is called beuerley / and also brokkesly. For many brockes were wonte somtyme to come thyder oute of the hilles that ben the¦re nygh / There seynt Iohan builde a chirche of seint nicholas and another of seint Iohan baptist in the hille for refresshing and fe¦ding of bretheren / The fredome and the priueleges of that place is encreced to grete prouffit and worship / so that ther is receyued no bataille and stryf bitwene tweyne / but who that is accused shal purge him self with his owne honde I••em Beda vbi supra After this Iohan his preest wilfridus was bisshop thirtty yere

R¶ This hete the yonger wilfridus and ouerpassed bedaes

tyme, For ther were thre famous wilfrydes. the fyrste was the more wylfrydns that went thryes to Rome of him we haue spo¦ken to fore honde / that other was the yōger wylfrydus that was bisshop of yorke / after seynt Iohan of beuer••ey· the thyrdde was bisshop of wyccyes after Egwin••e. ¶Willelmus de pontificib{us} libro secundo Kyng Iue bylded on abbaye at glastenbury as Aldelm had counseylled hym somtyme ¶ That abbay endured nobly vnto the tyme of the danes / but afterward by help of dun¦stan vnder kynge edmond and kynge edgar / that abbay was no¦bly amended and arayd to the comynge of normans / But after that tyme I note by what mysshappes / it is alweye sette with wycked trauaylles· ¶Also the abbottes of that place for greete Rychesses ben proude & bycome tyrauntes and swellen in pryde outward and be not wroth / & ben cruel in ward and not prouffy¦table And that was specially knowen in abbot thurstinus tyme ¶R Thider were translated the boones of seynt hilda thabbes¦se / of colfrydus thabbott of gyrwye / & somme bones of Bisshop aydan the which bones king Edmond brought with hym whan he was in the iourney ayenst the Scottes ¶There resteth the se∣cond patriark of Irlond abbot and confessour / The mar••iloge that is redde on seynt bartilmeus day sayth that he wold conuerte the yrysshe men and myghte not / ther fore he forsoke yrlonde and cam to glastyngbury and deyd there on seynt Bartilmeus daye