Prolicionycion [sic]

¶ Capitulum 17

ABoute that tyme deyde Aydanus and Finanus bisshops of Northumberlonde / And Colmannus a Scot come after hem to be Bisshop thre yere / ¶ In his tyme come Agilbertus Bisshop of westsaxons in to the countreyes of Northumberlond And ordeyned wylfrydus that was tho Abbotte of Rypon and made hym preest atte prayers of kynge oswyns ¶ That tyme was a greete question made and meuyd of the Eesterdaye that was not that tyme holden lawfully of scottes & of brytons but it was suffryd at reuerēce of colūba of aidanus of fimanus and of other holy faders / Therfor was a counseyl made in thabbay of Hilda. there in that one syde cam colmannus the bisshop and hyl¦da thabbesse· and alleggyd for them that her predecessours were worthy men and holy & helde the Eester tyde from the fourtenth day of the mone vnto the xx day of the mone· And specially seint Iohn the euangelyst helde soo the cestirtyde in Asia / In that otherside ayenste hem cam Egylbertus Bisshoppe of westsaxons Iames that was somtyme Paulinus preest the Archibisshop of Yorke and wilfridus abbot of Rypon and Alfridus the kin¦ges sonne / And Wilfridus disputed for hem and aledged for hem that the maner and the vsage of al hooly chirche of Grekes

of ytaly of Rome Of gallia and of Fraunce / shold be sett to fore the maner customme and vsage of a corner of the world that kne¦we not the decrees of synodes as it is no wonder· namely while seynt Iohan the euangelyst in the begynnyng of holy chirche that was tho yong and tendre helde thordenaunce of moyses lawe in many thynges and folowed tho the Iewes as it is wreton of poule that he circumcided thymothe and offred oostes in the tem∣ple and share his heede with Aqnyla and priscilla at Corynthy And that was profytable to nothyng but for to put of the sklaū¦dre of the Iewes / And also seynt Iohan by the vsage of that la¦we byganne to holde the eester tyde the fourtenth day of the first moneth and rought not whether it fil on a saterday or in another day of the weke / And peter thappostle that was primate of holy chirche and hadde power to bynde and vnbynde. he abode the four tēth day of the mone whan the mone were at full as seynt iohn dyde and bygan to holde the eester tyde at eue the next sonday af∣ter the ful of the mone and the euenes of the day and the nyghte and helde that tyde to the one and twenty day of the mone / And yf the fourtenthday fyll on a sonday he helde not there the Eester day. For that sonday was of the rather yere and not of the newe yere that shold tho begynne / kynge oswy herde this and sayde. ••ith that ye telle that so many and grete pryueleges and power be graunted to seynt peter I dar not withsaye soo grete an vssher & porter / lest he close heuene yate ayenst me whan I sholde come to heuene / Whan this was sayde the multitude assented / But Ced Bisshop of the eeste was there presente and helde hym corrected from that tyme forward / But colmannus that was tho bisshop of northumberlond was tho wroth and wente thennes in to the coūtrey of scottes for to fynde the eester tyme withoute fayle ther ben rewles ynowe in the ordynal of the kalendre and it is nede∣ful to sette it here / But the errour that holy chirche suffreth in the kalender that we. vse is so encreced that the styntyng of the son¦ne and the euenes of the day and night and thentryng of the son¦ne in to signes ben passed backward by twelue dayes in our ka¦lender now aboute the yere of our lord a thousand / iij / C and twenty / And therfore but our kalender that we vse / be amended by withdrawing of the dayes that ben put in to lepe yere / to a cer¦tayne tyme or in somme other maner wyse. yf the tyme of grace dure to eyghten thousand yere· eesterday shall falle aboute the shor¦test day of al the yere by our kalender / And yf the sixthe age of

world dure two soo longe· the feeste of the byrthe of seynt Iohan baptist shal falle in the shortest daye of the yere. And the feeste of the byrthe of our lord in the lengest day of the yere ¶ The cause of this errour is declared in tholomeus book. in Almagestis tho¦lomei Treuisa ¶Here take heede that twyes in the yere falleth the styntyng of the sonne and soo doth the euenees of the daye & of the nyght that is callyd in latyn equinoxium. the stynting in winter of the sōne is whan the day is shortest & eke in somer whan the daye is lengest / the euennes of the daye and nyght is ones in lente and ageyne in haruest tyme / whan the daye and nyght ben lyche longe / And for we speke of the sonnes entringe in to signes ye shal vnderstande that euery moneth ones the sonne passed oute of one signe in to another / And for we speke of the moneth of the mone. the moneth of the mone is from chaunge to chaunge / or from pryme to pryme Also the fyrst moneth of the mone is heere callyd the tyme of the mone / whan it is ful whan the day and nyght ben lyche longe in marche or next after / For in suche a tyme the world was fyrst made ¶Willelmus de pontifi∣cibus libro tercio / thenne Colmannus bisshop of northumberlond was conuycte by wylfridus of mysholdynge of the esterday and was wroth and wente to the Scottes as it is afore sayde / And the same wilfridus was chosen Archebisshop of yorke by procu∣rynge of Alfridus that was the kynges sonne. And was sente in to Fraunce for to be sacred / For deus dedit tharchebisshop of Caunterbury was dede that sholde haue sacred hym here in En∣glonde That tyme kenwalcus kynge of westsaxons deled his prouynce in two bisshopryches ¶ Therfore egilbertus was wroth and wente ageyne in to fraūce there he was born and other thin¦ges as it is sayd in the same book· Capitulo 15. Paulus libro / 6 Aboute that tyme Constantyn themperour wolde delyuer ytalye of the hondes of the longobardes and cam to Tarent in ytalye & axed there of an holy man that was solytarie / whether he mighte ouercome the longobardes or noo / he answerde that / it myght not yet be doo. For by cause of an abbaye that is founded in Ytalye in worship of seynt Iohan baptist / seynt Iohan prayeth alweye for the longobardes / But the time shal come whan that Oratory shal be despysed and vnworthy persones shal dwelle therinne. And thenne the longobardes shal fyrst be perisshed-Themperour rought not therof & wente forth ayenst the longobardes but he spedde not. ¶ But le spoylled Rome not withstondynge

that vitalianus the pope prayd hym for to leue / And this Em∣perour dyde many grete tyrantryes in Scicilia / and had atte last his penaunce in a bathe / Wilfridus as it is sayd was chosen Ar¦chebisshop of york and was by yonde the see with agilbertus aby¦dynge his confirmacion / Thenne the counseyl of the quartadeci∣mannes that ben they that helde the eester daye in the fourtenthe daye of the mone kyng oswy toke Cedde Abbot of lestyngay and made him Archibisshop of yorke ayenst thordenaunce of holy la∣wes. Willelmus libro tercio capitulo visesimo septimo. and sente hym in to kent for to be sacred bisshop / But for thachebisshop de¦us dedit was ded cedda torned to wina bisshop of westsaxons for to be ordeyned of hym and toke with hym two bisshops of Bri∣tons in his company to be with hym at his sacrynge. Thenne wil¦fridus come oute of Fraunce and sawe cedda made bisshop in his stede. thenne wilfridus abode in kente thre yere vnto the comyng of theodorus and made ther ordres and halowed chirches and ma¦de one putta a connyng man of songe bisshop of Rouchestre ¶Also that yere Benet bisshop wente agayn to Rome and in his comyng homwarde he was shorne in thabbaye lirnence and was there two yere / ¶ And thennes he wente to Rome / the thyrdde tyme and come agayne in to Englond with theodorus the bisshop and Adrianus thabbott atte commaundement of Vi∣talianus the pope. Cissa the kyng. kynge Iues fader made an ab¦baye at Abendon / ¶ That yere seynt Leodegarins suffred deth in Fraunce vnder one Ebroinus the grettest man of the Kynges hows ¶Constāntinus themperour was slayne of his owen men in a bath in Scicilia ¶After Vitalianus the holy pope A deo da¦tus was pope four yere / In his tyme seynt Benettes body was translated with the bodye of his suster Scolastica· Augustus a monke of Floria translated hem in to thabbay of Floria / that is besyde Orleaunce fro the mount cassin that is in the prouynce bo¦neuent