¶ Capitulum 16 /
AFter Eugenius vitalianus was pope fourten yere / he sent to the chirches of englonde and to the Archebisshops theo¦dorus monke of Tarseus / Beda li / 3 / ca / 19 / That yere the merces that be now of myddel englond receyued cristēdom vnder her prin¦ce Weda pendas sone· For this weda by consente of his fader had wedded elfleda kyng oswyes doughter vpon a condicion that he shold be a crysten man / and he dyde it with the better wyll for el∣fridus oswyes sonne had wedded oswyes suster kyneburga / ther fore weda had brought with hym four preestes oute of northum¦berlond for to preche hys peple and his men / the prestes were ced adda becti & duina. & kyng penda forbad not to conuerte to cristen feyth all that wold / Also that yere deyde honorius archibisshop of caūterbury / & after one yere· one deus dedit was bisshop ix yere / him comfermed Ithamar bisshop of Rouchestre / W / de / pou. li. 3 / ¶ That yere benet bisshop and the abbot that norysshed beda the preest and was kynge oswyes seruaunt forsooke hows & home his cosyns and alle his kyn for cristes loue and toke the weye to Rome and come efte agayne / Fyne sythes he wente to Rome and broughte bookes and Relyquyes of holy Sayntes