Here begynneth a shorte and abreue table on the Cronycles ...

¶How Cadwaldre wente out of this londe in to lytell Brytayne.

CAdwaldre sawe grete hungre mortaly∣te & pestylence / and the londe all poore / & faylynge cornes ād other vytaylles / and his folke perysshed / & sawe also the mooste partye of his londe all wasted & voyde of people. He apparelled hym and his folke that were lefte alyue / and passede ouer in to lytell Brytayne with a lytell nauy vnto kynge Alayne that he moche loued / that was his cosyn and that his fader hadde moche loued in his tyme. And as they sayled in the see / he made moche lamen∣tacyon / and so dyde alle tho that were with hym and sayde. (Dedisti nos domine tanquan•• oues escarū. et in gentibus dispersisti nos)

ANd thenne began Cadwaldre to com¦playne hym to his folke pyteously and sayd· Alas sayd he / to vs wretches & caytyues is sorowe for our grete synnys / the whiche we wolde not amende vs whyle we had space / & now repentaunce is comen vpon vs throughe my sauenture / whiche chaced vs out of oure reame and propre soyle. And out of the whiche somtyme Romayns. Becottes. Saxons / ney∣ther Danys myght not exyle vs. ¶But what auaylleth it now to vs that before tyme / oft ty¦mes haue goten many other londes / syth it ys not the wyll of god that we abyde and dwelle in our owne londe. God that is very Iuge yat all thynges knoweth before they ben done or made / he seeth that we wolde not cesse of oure synnes / and that our enmyes myghte not vs ne our lygnage exyle fro / and out of our reame He wolde that we amende vs of oure folyes and that we see our propre defautes.

And therfore hath shewed to vs wrathe / and woll chastyse vs of our mysdedes. Syche that he doth vs with out batayll / or strength of our enmyes / by grace companyes / wretcchedly to leue our reame & propre londe. ¶Torne ayen ne ye Romanys / torne agayne ye Scottes tor∣ne agayne ye Saxxons / torne agayne ye Fraū¦soys. Now seweth to you Brytayne all deserte the whiche your power myght neuer make de∣serte / ne yet oure power hathe not put vs now in exyle But onely the power of the kynge all∣myghty whom we haue often offended by our folyes / the whiche we wolde not leue vntyll he chastyced vs by dyuyne power ¶Amonge the worldes & lamentacyon that the kynge Cad∣whldre made to his folke / they arryued ī lytell Brytayne / and came to kynge Alayne before sayd ¶And the kynge receyued hym with gre¦te Ioye / and made hym to be seruede wonder nobly. And there abode they longe tyme after ¶The Englesshe people that were left a lyue and were escaped the grete hungre and morta¦lyte / lyued in the best wyse that they myght. And moche people sprange and came of them ¶And they sente in to Saxonye where that they were borne to ther frendes for men / wye∣men / and chyldren / to restore the cytees with people and the townes that were all voyde of people / and for to laboure / traueyll and tylthe the erthe. ¶whan the Saxons herde these ty∣dynges / they came in to y^e londe wonder thye∣ke in grete companyes / and herborowed ther∣selfe in the countree all aboute where that they wolde / for they founde no man them for to let∣e ne withstonde. And so they waxed & multe∣plyed gretely. And vsed the maners and custo¦mes of the countree wherof they were come. And they vsed also the lawes and the langa∣ges

and speche of theyr owne londe that they came fro. And also they chaunged all the na∣mes of Cytyes / twones / castelles / & brought / & yaue them names and called as they nowe ben called And they helde the Counrees. Barona∣ges & lordeshyps in manere as the Brytons be¦fore tyme had compassed them / And amonge other grete companyes that came frome Ger∣mayne in to this londe / came the noble quene that was called Se••burga with men & wym∣men without nombre· And arrayed in the coū¦tree of Northumberlonde / and tooke the londe frome Ilbion vnto Cornewaylle for her & for her folke. For there was none that myght thē lette / for alle was desolace & voyde of people / but it were a fewe poore Brytons that were lefte on mountayns & woddes vntyll that ty∣me. ¶And fro that tyme forthe loste the Bry¦tons this reame for all theyr dayes. And the Englysshe people begane to regne / and depar∣ted the lōde bytwene them. And they made ma¦ny kynges aboute by dyuerse partyes of the londe as here ben dyuyded. The fyrst of weste¦sexe / The second•• Merchenriche / The thyrde Estangle / the fourthe Kente / the fyfth South∣sex. All those regned in this londe after y^e Cad∣waldre was passed out of this londe / & dwelled in lytell Bryten with kynge Alayne his cosyn and true frende. And whan he had longe dwel¦lede there / and had knowynge that the morta∣lyte and pestelence was ouerpassed / & that the londe was replenysshed / ayen wyth people / he thought to torne ayen in to his londe And pray¦ed kynge Alayne his cosyn of socour & helpe y^t he myghte be restored ayen to his owoe propre reame and fyrste dygnyte / And kynge Aleyne graunted hym his askynge. ¶Thenne dyde he appareylle hym to take his wayt and vya∣ge in to this londe. And prayed god allmyghty deuoutly that he wolde make to hym demon∣stracyon / yf his prayer to this londe were too hyme plesaunt or none / for ayenste the wyll of god allmyghty he wolde no thynge do. ¶whā he had thus deuoutly made his prayer / avoys fro heuen to hym sayd. And hadde hym leue y^e Iurney a waye in to Englonde / and that he sholde goo to the pope of Rome for it was not the wyll of almyghty god y^t the Brytons shol∣de regne more in Brytane / ne neuer recouered it vnto the tyme of the prophecye that Marlyn sayd before he fu••fylled. And that sholde neuer be vnto y^e tyme were come / that the relyques of his body shall be broughte fro Rome & trans¦lated in to Brytayne / And whan the ralykes of other sayntes that haue ben hedde for y^e per∣secucyon of the paynem folke shall be founde & openly shewed / thenn shalle they recouer theyr londe agayne / the whyche they haue soo longe tyme loste throughe theyr desertes. ¶whane Cadwaldre hadde herde this answere / he mar¦uayled gretely and tolde it to the kynge Aleyne ¶Thene kynge Aleyne dyde sende for the cler¦gye of his londe / and made them to brynge the storyes and prophecyes that Merlyn and Sy¦byll had sayd in theyr prophcyes. And whan he knewe that the prophycye that Festom had prophecyed of the Egle. And other prophecyes accorded to the dyuyne aunswere that Cadde∣walldre had herde. He counselled hym & ryght faythfully desyred hym to leue his people and his nauy / & submytte hym to the dyspocysyon of god / and do all that the aungell had cōmaū¦ded hym. ¶Thenye Cadwaldre called y••or his sone and ymori his cosyn that was his sys∣ters sone / & sayd to them. Taketh sayde he my folke & my nauy that is here all redy / & passe into walys and be ye lordees of Brytons that no dyshonoure come to them by interrupcyon of the Paynem folke for defaute of lordes. ¶And thene hymselfe lefte his reame of Bry¦tayne and his folke for euer more / and tooke his waye vnto the pope of Rome Sergius the whyche worshypede hym moche / and so he w¦as confessed / and toke penaunce for hys syn∣nes. And he had not longe dwelled there that he ne deyed / the .xii. Kalendis in Maye •• the yere of grace .v.C.lxxii.