¶whan Aurilambbros deyed a sterre in the morne was seen wyth a clere lyght / & at the bought of the beeme was sene the heed of an horryble dragō
SO whan the kyng Aurilambros was deed & enpoysoned at winchestre. On the morne after he was dede aboute the tyme of Pryme there was sene a sterre grete & clere & the beeme of that sterre was brygheter thā ye sonne. And at the bought of ye beeme apperyd a dragons heed / & out of hys mouth came two huge lyghtes / that were as bryght as ony fyre brennynge. & that one beeme to warde Fraun∣ce and streyght ouer the see thyther warde. And out of that beeme came .vii. beemes full clere and longe as it were the lyghte fyre. ¶This ••••erre was seen of many a man / But none of them wyste what it be tokened. ¶Vter that was the kynges brother / that was in walys wyth hys hoste of Brytons / sawe that sterre & the grete lyght that it yaue / they wondred ther of gretly what it myghte betoken. And lete cal¦le Merlyn and prayed hym for to telle what yt it myhght betoken.