¶How kynge Hēry wedded quene Margarete. & of her coronacyon.
THis yere kinge henry maryed at Suth¦wyk quene Margarete. & she came to lō¦don ye .xxviii. day of may. And by the waye al ye lordes of Englōde receyued hyr worshypfully in dyuerse places. And ī especiall duke of Glou¦cestre. & on the Blacke heth the Mayre with all the aldermē. & all the craftes in blewe gownes broudred wyth the deuyse of hys crafte. yt they myght be knowen met with hyr with redde ho∣des & brought her to londō. where were dyuer∣se pagēris & countenaūce of dyuerse hystoryes shewed in dyuers places of the Cytie costely. ¶And the xxx. daye of May. the forsayd quene was crowned at westm̄ & ther was Iustes thre dayes durynge wythin the Sayntwary before ye abbaye ¶This yere the pryour of Kylmain apeled therle of Vrmonde of treason. whyche had a daye to theym assygued for to fyght in Smythfelde. And the lystes were made & the felde dressed But whā it came to poynt. ye king cōmaunded that they sholde not fyghte. but to∣ke the quarell in to his honde. And this was do¦ne at ye Instāce & labours of certayne prechers & doctours of lōdon. as mayster Gylbert wor∣thyngton persone of saynt Andrewes in Hol∣bron. & other. ¶Also this yere came a grete em¦bassate in to Englonde out of fraūce. for to ha∣ue cōcluded a perpetual peas. but in cōclusyon it torned in to trewes for a yere ¶Aboute this time dyed saynt Bernardyne a gray frere whi¦che began the newe reformacyō of the ordre in many places in so moche. yt they. that were re∣formed. bē called Obseruaūtes▪ whyche obser∣uauntes been gretly encreaced in Italy & in al¦mayn. this Bernardyn was canonysed by po¦pe Nycholas the .v. in the yere of our lorde .MCCCC.l. ¶Iohānes de Capristrano was his dysciple whiche profyted moche to the reforma¦cion of that ordre for god hathe shewed many a fayre myracle. ¶Also here is to be noted. that frome this tyme forwarde. kynge Hēry neuer profyted ne wente forwarde. but fortune begā to torne frome hym on all sydes. as well in fra∣unce Normandye. Guyon. as in Englonde. sō men holden oppynyon that kynge Henry gaue commyssyon preuarly to Syr Edwarde Hull syr Robert Roos / Deane of Saynt Senerynes and other / to cōclude a maryage for hym. with the Erle of Armynakes syster. whiche was pro¦mysed as it was sayde and cōcluded / and after broken / and he wedded quene Margarete as afore is sayde / and a full dere maryage for the reame of Englonde / for it was knowe verely / that for to haue hyr delyuerde was ye duchy of Angeo & the erldom of Mayn whiche was the keye of Normandye for the frenssmē to entre / ¶And aboute this the sayde Markys of Suf¦folke axed in playne parlement· a fyftene and an half / for to fetche her out of fraūce. ¶Loo what a mariage was this as to the comparysō of that other maryage. For there sholde haue be delyuerde. so many castels and Townes in Guyon / and so moche golde sholde haue be ye∣uen with her / that alle Englonde sholde haue be therby enriched / but cōtrary wyse fell wher¦fore euery grete prynce ought to kepe hys pro∣myse / For bycause of brekynge of this promy¦se / & for maryage of quene Margarete. what losse hath the reame of Englond had / by lesyn¦ge of Normādye & Guyon / by dyuysyon in the reame / ye rebellynge of comyns ayēst ther prin¦ce and lordes / what dyuysyon amoge ye lordes what murdre and sleynge of theym / what fel∣des foughte & made / in conclusyon soo many yt many a man hathe loste his lyfe / & in conclusy¦on the kynge deposed. & the quene wyth her soo¦ne fayne to fle into Scotlōde / & from thens in to Fraūce. & so to Loreyne / the place that she ca¦me fyrst fro. many mē deme that the brekynge¦ge of the kynges promyse to the systyr of the er∣le of Armynack / was cause of his greate losse & aduersy••e.