¶How kynge Edwarde deyed.
SO as kynge Edwarde had abatyd hys enemys turned south warde. and syke∣ned atte Burgh vpon sande in the marche of Scotlonde. and callyd to hym Henry Lacy er¦le of Nichell. syr guy erle of warwyk. syr Ayl∣mer erle of Penbroke / and syr Robert of Clyf¦forde baron and prayed theim vpon the fayth that they hym oughte / that they sholde make Edwarde of Carnaruan kynge of Englonde assone as they myght. And that they shold not suffre Peers of Ganaston come agayne in to Englonde / for to make hys sone to ryot / and they graunted hym with good wyll. And the kynge toke hys sacramente of hooly chyrche as a good Crysten man sholde. and deyed in re¦pentaunce And whan he hadde ben kynge .xxxv. yere he deyed / and was buryed at west∣mestre with moche solempnyte / Vpon whose soule god haue mercy.