¶Of the greate wynde / and how prynce Edwarde tooke the lordshyp of Guyhē of his fader and wente theder·
ANd in the .xxxvii. yere of kyng Edwar∣de the .xv. daye of Ianyuer / that is too saye on saynt Maryes daye about euynsonge tyme there arose & come suche a wynde out of the southe wyth suche a fyersnes and strenthe that it brasted and blewe downe to the groun∣de hyghe houses and stronge buyldynges tou¦res chirches & steples and other strōge places and all other stronge werkes that stoden stylle were shaken ther with that they ben yet & shall euermore be the febler and weyker whyle they stande. And this wynde lasted without ony ces¦synge .vii. dayes contynually· And anone af∣ter there folowed suche waters in the hey ty∣me and in the haruest tyme that all felde wer∣kes were strongely lette and lefte vndoyn. ¶And in the same yere prynce Edwarde toke the lordshyp of Guyhen & dyde to kynge Ed∣wyrde his fader homage and feaute therof / & wente ouer see in to Gascoyne with his wyf & chyldren. ¶And anone after kynge Edward made hys sone Lyonell duke of Clarence. and syr Edmonde his other sone / erle of Cambrid¦ge / & in the .xxxviii. yere of his regne it was or∣deyned in the parlement that men of lawe bo∣the of the chyrche and temporeslawe shold fro that tym for the plete in theyr moder tonge. ¶And in ye same yere in to Englond thre kyn∣ges that ys to saye the kynge of Fraunce the kynge of Cypres and the kynge of Scotlonde by cause to vysyte and for to speke with ye kyn¦ge of Englonde. And after that they had be he¦re longe tyme two of them went home in to the¦yr owne countres and kyngodms / but ye kyn∣ge of Fraunce throughte greate sekenesse and malady that he had abode stylle in Englonde. And in the .xxxix. yere of his regne. was a strō∣ge & a grete froste & that lasted longe that is to saye fro Saynt Andrewes tyde to the .xiii. kal of Apryls / that the tylthe and sowynge of the erthe and other suche feld werkes and honde werkes were moche lette and lefte vndoyne for colde & hardnes of the erth. And at orray in Brytayn was ordeyned a grete dedely batayl¦le bytwene syre Iohn̄ of Mountforde duke of Brytayne and syr charles of Bloys / but vyc∣tory fell to the forsayd syr Iohn̄ thrughe helpe and socour of thenglysshmen. And there were taken many knyghtes & squyres & other men that vnnōbred / in ye whiche batayll was slay¦ne Charles hymself with all yt stode about hym & of Englysshmen were slayne but seuen. and in this yere deyed at sauoy Iohan the kynge of fraunce whos seruyce & exequyes kyng edwar¦de lete ordeyne & dyd in dyuers places worhyp∣fully to be done / and at Douer of worshypful men ordeyned hym worthely tho be ledde with his owne costes and expēces / & fro thens was brought to fraunce & buryed at saynt Denys. ¶In the .xl. yere of kyng Edwarde the vii. kal of Februer was borne Edwarde prynce Ed¦wards sone ye whiche whan he was .vii. yere of-aege he deyed· And in the same yere it was or∣deyned yt saynt Peters pens fro ye tyme forthe sholde not be payed the whyche kyng yuo som∣tyme kynge of Englond of the countre of west saxen yt began to regne ye yere of our lord god .vi· hondred .lxxix. fyrst graunted to Rome for ye scole of Englond therto be contynued. ¶And in thys same yere there fell a grete rayne in hey tyme yt it wasted & dystroyed both corne & hey. And there was suche debate & fyghtinge of spa¦rowes by dyuerse places in these dayes yt men founde innumerable dede in the feldes as they wente. And there fell also suche a pestylence yt neuer seen suche in noo mannes dayes yt than lyued / for men yt wente to beded hole & in good poynt sodenly they dyed. ¶Also ye tyme a syke¦nes that men calle the pockes slewe bothe mē & women thrugh theyr enfectinge. ¶And in the xli. yere of kynge Edward was borne at Bur∣deux Rycharde the seconde sone of prynce Ed¦warde of Englond / the whiche Rychard kyn¦ge Rycharde of Amorycan heueden at the foū•• stone after whom he was called Rychard. and this same Rycharde whan his fader was deed