and a deep-fet sighynge to a synful herte. After þis biholdynge thus of þi wrecchide lyuynge in general, þow schalt haue mynde and biholdynge of þe kyndenesse of þi lord god; and seie þus, bothe with herte & with mouth as it is seid bifore: 'Lord god al-myȝty, sum tyme whan i. hadde no beynge and was nouȝt, þow brouȝtest me forth to þin ymage and to þi liknesse in to so noble a beeynge aboue alle oother creatures, þorugh þe whiche, hadde i. not synned, i. myȝte haue had þee by grace in þis lif, and in þat oother haue seie þee face to face in blisse. And i, þis wrecchide erthely worm, þe mooste vyleste synnere of alle, haue in so muche deserued þe streitnesse of þi riȝtwys doom, þat but ȝef þow helpe me ȝeuyng me þi mercy, it weere bettere to me neuere to haue been bore'. Heere schalt þow sighe & sorwe as þow dedist bifore. And after haue mynde of þe kyndenesse of his incarnacion, seiynge þus, bothe with herte & with mouth ȝef þe bothe luste: 'Lord Ihesu Crist, art þow not he þat highe kyng of aungelis, so lowely mekynge þee and so wilfully for me takynge vpon þee alle þe charges & þe wrecchednesses of mankynde as hunger, þurst, and coold, with al þe remanant saue synne & ignorance; and i. lord, this wrecchide erthely worm, not mekyng me but highyng me in so muche þat i haue displesyd þin highe maieste, chaungynge þee þat art þe welle of euerlastynge goodnesse for a fewe foule stynkynge fleschly delytes of þis wrecchide lif? A deere Ihesu, whider may i flee? huyde me may i. not, and schew me dar i. not'. Heere schalt þow sighe & sorwe as þow dedist bifore. And after haue mynde of the kyndenesse of his passion, and seye þus: 'Was it not Inough to þe, my swete lord Ihesu, þus to bicome man for þe loue of man, but ȝef þow ouer þat for þe releeuynge of so menye deedly wrecches tokest vpon þee to suffre so harde betynges, so innumerable woundes, þat fro þe sole of þi feet to þe coroune of þine heed was no lyme ne skyn of þi blessede body þat it ne fomede ful of þi precious blode? A, i. wikkede curside wrecche, what may i doo? i am cause of þi deeth. Wheer may i wone? for by riȝtwis doom of resun alle the creatures þat been bitweene heuene & helle schulden fiȝte aȝen my oonly body. Nowe trewely, lord, i. am wel apaied þat þei so doo: Let hem ryse, lord, as þin owene seruauntȝ of þin owene houshold, and venge with maistrie her lord & here makere of me þis straunche fremde wrecche, þat so traytourly haue been cause of my lordes turment'. Here þow schalt sighe & sorwe as þow dedist bifore, hauynge goostly mynde of his precious passion, wounde by wounde, to þe holugh of his herte. But by-cause þat thise three kyndenesses bifore nempned, þat is to seye: thy makynge, his mankynd takynge, and his precious passion, haan bee do generally to alle oothere as wel as to þee: þerfore schalt þow after þis haue special mynde of sum special kyndenesse doon to þin oonly body bifore menye oothere, and seye þus: 'A goode swete lord Ihesu Crist, how menye as worthi and by a þousand-foold moore worthy þan i, han be suffred of þee, swete lord, for to dye, summe in here modres wombes, and summe soone after here burthe bifore eny bapteem, and so to bee dampned to eendeles derknesse; and summe to lyue in here hethenesse to here [deth]-day, and so to be dampned to eendeles peyne? And i., sweete lord Ihesu, of þin ouerhaboundaunt goodnesse & þorugh þe grace of bapteem am brouȝt in to þi foold, þe whiche is holy churche, to be a scheep of þi flokke pasturynge in þi lawe, þere be kept and saued fro þat apert dampnacion of alle mysbyleuynge'. Here schalt þow þanke þi lord god as hertly as þow maist; & after þow schalt þenke þus and seye with þi mouth: 'How meny moore worthy and fer moore able to grace þanne i. am, by-cause of meny moo goode dedes doon after here bapteem þan i. haue doon after myn, been riȝtfully suffred of þee, swete lord, summe to been honged or heded, styked or drenched or sodeynly deed in sum deedly synne, and so to be dampned to eendeles fuyr? ȝe sikerly, lord, it may be þat a þowsand moore worthy þanne