[6-text p 551]
That was the cause / he gan so ney him drawe
To his ȝeman / to herken al his sawe
And thus he seide / vn-to his ȝeman thoo
holde þou thy pees / & speke no wordes moo
Line 693
ffor if þou do / thow shalt it dere a-bye
Thow sclaundrest me heere / in this companye
And eke discouerest / þat þou shuldest hide
Ȝa quod oure hoost / telle on what so betide
Line 697
Of al his thretenynge / rekke nat a myte
In feith quod he / no more I do but lyte
And whan this Chanon saw / it wolde nat be
But his ȝeman / wolde telle / his pryuete
Line 701
he fledde a-wey / for verrey sorwe & shame
A quod the ȝeman / heere shal rise a game
Al that I can / a-noon I wol ȝow telle
Syn he is gon / the foule fend him quelle
Line 705
ffor neuere heere-after / wyl I with him mete
ffor peny ne for pound / I ȝow byhete
he þat me brought first / vn-to that game
Er that he dye / sorwe haue he & shame
Line 709
ffor it is ernest to me / be my feith
[So shall he fynd forsoth þat it assayeth. [Eg. 2726 folio 226a] ] ["deficit versus" Dd.]
And ȝet for al my smert / & al my grief
ffor al my sorwe / labour / & meschief
Line 713
I coude neuer leue it / in no wyse
Nowe wolde god my wyt / myght suffise
To tellen al / þat longeth to that art
And nathelees / ȝow wil I tellen part
Line 717
Syn þat my lord is gon / I wyl nat spare
Swich thyng as that I knowe / I wil declare
Heere endeth the prologe of the Chanons Ȝeman /
