[6-text p 259]
¶ The ende of this caityf / was as I shal seye
his foomen maden a feste / vp-on a day
And maden him as here fool / bifore hem pleye
And this was in a temple / of gret array
Line 3272
But atte laste / he mad a foul affray
ffor he two pilers shoke / & made hem falle
And doun fel temple & al / and there it lay
And slow himself / & eke his foomen alle
Line 3276
¶ This is to seyn / the Princes euerychon
And eke thre thousand bodies / were there slayn
with fallyng of the gret temple / of ston
Of Sampson / now wol I no more sayn
Line 3280
Beth war by this ensample / old and playn
That no men telle here counseil / to here wyues
Of swich thyng / as they wolde han secree fayn
If þat it touche / here lymes / or here lyues
Line 3284
[Hercules.]
¶ Of hercules / the Souereigne conquerour [¶ Hercules]
Syngyn hise werkes laude / & heigh renoun
ffor in his tyme / of strengthe he was the flour
he slow & raft the skyn / fro the leoun
Line 3288
he of Centaures / leide the boost a-doun
he Arpies slow / the cruel briddes felle
he goldene Apples reft / of the dragoun
he drow out Cerberus the hound / of helle
Line 3292
¶ he slow the cruel tyraunt / Busirus
And mad his hors / to frete him flessh & bon
he slow the firy serpent / venimus
Of Achilois hornes two / he brak oon
Line 3296
And he slow Cakus / in a kaue of ston
he slow the Geaunt / Anthous the stronge
he slow the grisly Boor / and that a-noon
And bar the heuene / on his nekke long [folio 180a] [¶ id est diu]
