In wysdom / and in trouthe of mariage
And seide hise orisouns / as is vsage
And crouched hem / and bad god shuld hem blis
And mad al seker I-now / with holynes [folio 111b]
Line 1708
THus ben they wedded / with solempnyte
And at the fest sitteth / he and she
With othere worthy folk / vp-oon the deys
Al ful of ioye and blisse / is the paleys
Line 1712
And ful of Instrumenteȝ / and of vetaille
The most deynteuous / of al ytaille
Byforn hem were there / Instrumentes of swich soun
That Orpheus / nor Thebes Amphioun
Line 1716
Ne maden neuere / swich a melody
At euery cours / than cam loud Mynstralsy
That neuere tromped / Ioab / for to here
Ne he Theodomas / half so clere
Line 1720
At Thebes / whan the Citee was in doute
Bacus / the wyn / hem shynketh al a-boute
And venus laugheth / vp-oon euery wyght
ffor Ianuarie / was bycome hire knyght
Line 1724
And wolde both assayen / his corage
In liberte / and eke in mariage
And with hire fyrbrond / in hire hand aboute
Daunceth byforn the Bryde / and al the route
Line 1728
And certeynly / I dar wel seyn this
That Ymeneus / which god of weddyng is
Saw neuere his lyf / so merye a wedded man
holde þou thy pees / thow Poete Marcian
Line 1732
That wrytest vs / that ilke weddyng mery
Of hire philosophie / and hym Marcury
And of the songes / that the Muses song
To smal is bothe thy penne / and eke thy tong
Line 1736
ffor to discryuen / of this mariage
whan tendre ȝouthe / hath wedded stoupyng age
There is swich myrthe / that it may nat be wretyn
Assayeth it ȝoure self / than may ȝe wetyn
Line 1740
