¶ And suffreth vs / as for oure exercise
Line 1156
With sharpe skorges / and aduersitee
fful oft to be bete / in sondry wyse
Nat for to knowe / oure wyl / for certis he
Line 1159
Er we were born / knew al oure freeletee
And for oure best / is al his gouernaunce
lat vs thanne lyne / in vertuous suffraunce
Line 1162
¶ But oo word lordynggis / herkeneth or I go
Line 1163
It were ful hard / to fynde now a dayes
In al a Toun / Grisildis thre or twoo
ffor if þat thay were put / to swich assayes
Line 1166
The gold of hem / hath now so bad a-layes
With bras / that though the coyne / be fair at eye
It wolde rather breste a two / than plye
Line 1169
¶ ffor which here / for the wyues loue of Bathe
Line 1170
Whos lyf / and al hire secte / God mayntene
In heigh maistrie / and elles were it skathe
I wol with lusty hert / fressh and grene
Line 1173
Seyn ȝow a song / to glade ȝow I wene
And late vs stynt / of ernestful matere
Herkeneth my song / that seith in this manere
Line 1176
GRisilde is ded / and eke hire pacience
And bothe at ones / I-beried in Itaylle
ffor which I crie / in open audience
Line 1179
No wedded man / so hardy be / to assaylle
his wyues pacience / in trost to fynde
Grisildis / for in certeyn he shal fayle
Line 1182
