But she noon answere / of him myght haue
He went his wey / as him no thyng ne rought
But to Boloigne / he it tenderly brought
Line 686
¶ This Markys wondreth / euere lengere the more
Line 687
Vp-on hire pacience / and if that he
Ne had sothly / knowen ther byfore
That parfytly / hire children loued she [folio 100a]
Line 690
he wolde han wende / that of som sotiltee
And of malice / or for cruel corage
That she had suffred this / with sad visage
Line 693
¶ But wel he knew / that next him self certeyn
Line 694
She loued hire children best / in euery wyse
But now of wommen / wold I asken fayn
If theise assayes / myght nat suffise
Line 697
What coude a sturdy husbonde / more deuyse
To preue hire wyfhode / and hire stedfastnesse
And he contynuynge / euere in sturdynesse
Line 700
¶ But there be folk / of swich condicion
Line 701
That whan they han / a certeyn purpos take
They conne nat stynt / of here entencion
But right as they were bounden / vn-to a stake
Line 704
They wyl nat / of that first purpos slake
Right so this Markys / fullich hath purposed
To tempte his wyf / as he was first disposed
Line 707
¶ He wayteth / if by word / or countenaunce
Line 708
That she to him / was chaunged of corage
But neuere coude he fynde / variaunce
She was ay oon / in hert and in visage
Line 711
And ay the ferthere / that she was in age
The more trewe / if that it were possible
She was to him / in loue / and more penyble
Line 714
