This is my wyf quod he / that stondeth heere
Honoureth hire / and loueth hire I preye [folio 96b]
Who so me loueth / there is no more to seye
Line 371
¶ And for that no thyng / of hire olde gere [¶ De hinc ne quid reliquiarum fortune veteris nouam inferat / in domum nudari eam iussit;]
She shulde brynge / in-to his hous / he bad
That wommen shulde / dispoylen hire right there
Of which theise ladyes / weren no thyng glad
Line 375
To handle hire clothes / where-Inne she was clad
But nathelees / this mayden bright of hewe
ffro foot to hede / they clothed han al newe
Line 378
¶ Hire heres they kemed / that leyn vntressed
Line 379
fful rudely / and with here fyngeris smale
A corone on hire hede / they han I-dressed
And sette hire ful / of Ouches grete & smale
Line 382
Of hire array / what shulde I make a tale
vnethe the peeple hire knew / for hire fairnesse
Whan she transmeeuyd was / in swich richesse
Line 385
¶ This Markys / hath hire spoused / with a rynge
Line 386
Brought for the same cause / and thanne hire sette
vp-on an hors / snow whyte / & wel aumblynge
And to his Paleys / er he lengere lette
Line 389
With ioyeful peeple / that hire lad and mette
Conveyed hire / and thus the day they spende
In reuel / tyl the Sonne gan descende
Line 392
¶ And shortly forth / this mater for to chace
Line 393
I seye / that to this newe / Markysesse
God hath swich fauour sent hire / of his grace
That it ne semed nought / by lyknesse
Line 396
That she was born and fed / in rudenesse
As in a Cote / or in an Oxes stalle
But norisshed / in an Emperoures halle
Line 399
