I prey ȝow Alla / my labour to relese
I may not telle my woo / vn-til to-morwe
I am so wery / for to speke of sorwe
Line 1071
¶ But finally / whan the sothe is wist
That Alla / giltlees was / of hire woo
I trowe an / C / tymes / ben they kist
And swich a blisse is there / be-twix hem two
Line 1075
That saue the ioye / that lasteth euere moo
There is noon lyke / that any creature
Hath seen / or shal / while the world may endure
Line 1078
¶ Tho preyede she hire housbonde / mekely
In releef / of hire longe / pytous peyn
That he wold prey hire fader / specialy
That of his mageste / he wold enclyn
Line 1082
To vouchesaf / som day / with him to dyne
She preyed him eke / he wold by no wey
vn-to hire fader / no word of hire sey
Line 1085
¶ Somme men wold seyn / how that the child Maurice
Dooth this message / vn-to this Emperour
But as I gesse / Alla was nouȝt so nyce
To hym that was / of so soleyn honour
Line 1089
As he that is / of Cristene folk the flour
Sent ony child / but it is bete to deme
He went him self / and so it may wel seme
Line 1092
¶ This Emperour / hath graunted / gentilly
To come to dyner / as he him bysought
And wel reede I / he loked besily
vp-on this child / and on his doughter þought
Line 1096
Alla gooth to his Inne / and as him ought
Arrayed for this feeste / in euery wyse
As ferforth / as his conyng may suffise
Line 1099
