And yf this knyght woll swere how þat she
This womman slough yitte woll we vs avise
Whom that we woll that shall be our Iustise
Line 665
¶ A breton boke writen with Ewangeles
was fette / and on this boke he sware anon
She gilty was / and in the mene whiles
An hand hym smote / vp-on the nek boon
Line 669
That doun he fell at ones as a stoon
And both his yen brast out of his face
In sight of euery body in that place
Line 672
¶ A voys was herd in generall audience
And seid þou hast disclaundred giltlees
The doughter of holy chirch in high presence
Thus haast þou doon / and yitte hold I my pece
Line 676
Of this mervaill agast was all the prece
As mased folk þey stoden euerychone
ffor drede of wreche saue Custaunce allone
Line 679
¶ Grete was the drede / and eke þe repentaunce
Of hem that haden wrong suspescion
Vp-on this sely Innocent Custaunce
And for this mater in conclusion
Line 683
And by Custaunce mediacion
The kyng and many another in þat place
Conuerte' was thanked be Cristes grace
Line 686
¶ This fals knyght was slayn for his vntreuth
By Iugement of Alla hastely [Eg. 2726 folio 73a]
And yitte Custaunce hade of his deth grete reuth
And after this Ihesu of his mercy
Line 690
Made Alla wedden full solempnely
This holy maiden / that is so bright and shene
And thus hath crist ymade Custaunce a quene
Line 693
