The fruyt of this mater / is that I telle
Whan tyme come / men thouȝt it for the best
That reuel stynt / and men gon to here rest
Line 413
¶ The tyme come / this olde Soudanesse
Ordeyned had this fest / of whiche I tolde
And to the feest / cristen folk hem dresse
In general / ȝe bothe ȝonge and olde
Line 417
here moun men feest / and realte beholde
And deyntees moo / than I can ȝow deuyse
But al to dere / they bought it er they ryse
Line 420
¶ O sodeyn woo / that euere art successour [¶ Nota de inopinato dolore ¶ Semper mundane leticie tristicia repentina succedit / Mundana igitur felicitas multis amari|tudinibus est repersa . extrema gaudii luctus occupat Audi ergo salubre consilium in die bonorum ne immemor sis malorum;]
To worldly blisse / spreynde with bitternesse
The ende of the ioye / of oure worldly labour
woo / occupieth the fyn / of oure gladnesse
Line 424
herkene this counseil / for thy sekirnesse
vp-on thy glad day / haue in thy mynde
The vnwar woo / or harm / þat cometh behynde
Line 427
¶ ffor shortly to tellen / at a word
The Soudan / & the cristene euerichone
Ben al to-hewe / and stiked at the bord
But it were oonly / dame Custaunce allone
Line 431
This olde Soudanesse / cursed crone
hath with hire frendes / doon this cursed dede
ffor she hire selue wolde / al the contree lede
Line 434
¶ Ne was Surryen noon / that was conuerted
That of the counseil / of the Soudan woot
That he nas al to-hewe / er he a-sterted
And Custaunce han they take / a-none foot hoot
Line 438
And in a shippe / al steereles god woot/
They han hire sette / and bidden hire lerne saile [folio 59a]
Out of Surrie / ageynward to Itaile
Line 441
