¶ we shuln first feyne vs / cristendome to take
Cold water shal nouȝt greue vs / but a lite
And I shal swich a feest / and reuel make
That as I trowe / I shal the Soudan quyte
Line 354
ffor though his wyf be cristened / neuere so whyte
She shal haue nede / to wasshe a-wey the rede
Though she a fontful water / with hire lede
Line 357
¶ O Soudanesse / roote of iniquite
Virago thow semirame / the secounde /
O serpent / vnder femynynytee
like to the serpent / depe in helle I-bounde
Line 361
O feyned womman / al that may confounde
Vertue and innocence / thurgh thy malice
Is bred in the / as neste of euery vyce
Line 364
¶ O Sathan enuyous / syn thilke day
That thow were chased / from oure heritage
wel knowest þou / to wommen the olde way
Thow madest Eue / brynge vs in seruage
Line 368
Thow wylt for-don / this cristene mariage
Thyn instrument / so welawey the whyle
Makest þou of wommen / whan þou wylt begyle
Line 371
¶ This Soudanesse / whom I thus blame & warye
leet pryuyly hire counseil / gon here way
what shulde I in this tale / lengere tary
She rideth to the Soudan / on a day
Line 375
And seide him that she wolde / reneye hire lay
And cristendome / of prestes handes fonge
Repentynge hire / she hethene was so longe
Line 378
¶ Bysechyng him / to don hire that honour
That she must han / the cristene folk to fest
To plesen hem / I wyl do my labour
The Soudan seith / I wyl don at ȝoure hest
Line 382
