¶ I trowe at Troye / whan Pirrus brak the wal
Or ylyon brende / Thebes the Citee
Ne at Rome / for the harme thurgh hanybal
That Romeyns han venquyssed / tymes three
Line 291
Nas herd / swich tendre wepynge / for pitee
As in the chaumbre was / for hire departynge
But forth she moot / wheiþer so she wepe or synge
Line 294
¶ O first meeuing / cruel firmament [Vnde Ptholomeus libro 1o / capitulo .xo. primi motus celi / duo sunt / quorum vnus est / qui mouet totum semper / ab oriente in occidentem / vno modo super orbes &c. Item aliter vero motus est / qui mouet orbem stellarum currencium contra motum primum / videlicet ab occidente in orientem super alios duos polos &c.]
With thy dyurnal sweigh / that crowdest ay
And hurlest alle / fro Est til occident
That naturelly wolde holde / a-nother wey
Line 298
Thy crowdyng sette the heuene / in swich array
At the begynnynge / of this fiers viage
That cruel Mars / hath slayn this mariage
Line 301
¶ Infortunat ascendent tortuous
Of which the lord / is helplees falle allas
Ouȝt of his angle / in-to the derkest hous
O Mars. o Athasir / as in this cas [folio 57b]
Line 305
O feble Mone / vnhappy ben thy paas
Thow knyttest the / there þou art nought receyued
There þou were wel / fro thens art þou weyued
Line 308
¶ Imprudent Emperour / of Rome / allas [¶ Omnes concordati sunt quod elecciones sint debiles nisi in diuitibus habent enim isti licet debilitentur eorum elecciones radicem. id est . natiuitates eorum que confortat omnem planctam debilem in itinere &c.]
Was þere no philosophre / in al thy toune
Is no tyme bet than other / in swich a caas
Of viage / is þere noon eleccione
Line 312
Namely to folk / of heigh condicione
Nought whan a root / is of birthe I-knowe
Allas we ben to lewed / or to slowe
Line 315
¶ To shippe is brought / this wooful fair mayde
Solempnely / with euery circumstaunce
Now ihesu crist / be with ȝow alle she sayde
There nys namore / but fare-wel fair Custaunce
Line 319
