That euery wyght / with gret deuocion
Shulde preyen crist / that he this mariage
Receyue in gree / and spede this viage
Line 259
¶ The day is comen / of here departynge [folio 57a]
I say the wooful day / fatal / is come
That there may be / no lengere tariynge
And forthward they hem dressen / alle & some
Line 263
Custaunce that was / with sorwe al ouercome
fful pale arist / and dressith hire to wende
ffor wel she seth / þere is noon other ende
Line 266
¶ Allas what wonder is it / though she wepte
That shal be sent / to straunge nacione
ffro frendes / þat so tenderly hire kepte
And to be bounde / vnder subieccione
Line 270
Of oon / she knoweþ nouȝt / his condicione
housbondes ben alle goode / and han ben ȝore
That knowen wyues / I dar sey ȝow no more
Line 273
¶ ffader she seide / thy wrecched child Custaunce
Thy ȝonge doughter / fostred vp so softe
And ȝe my moder / my souereigne plesaunce
Ouer alle thynge / out-take crist on loft
Line 277
Custaunce ȝoure child / hire recomaundeth oft
vn-to ȝoure grace / for I shal to Surrye
Ne shal I neuere / sen ȝow more with eye
Line 280
¶ Allas vn-to the barbre / nacione
I must goon / syn that it is ȝoure wylle
But crist that starf / for oure sauacione
So ȝeue me grace / hise hestes to fulfille
Line 284
I wrecched womman / no fors though I spille
Wommen arn born / to thraldom & penaunce
And to ben / vnder mannes gouernance
Line 287
