¶ Hic Rex mandauit post Magnatos Troianos.
His Messangeres of Troye to crye, [folio 39b]
Line 2613
That euery lord scholde faste hye
To his paleis with-oute dwellyng,
To here a-monges hem his tellyng.
Line 2616
Thei sped hem faste and ȝede anon;
When thei were comyn euerychon,
Kyng Priamus to hem thus sais:
'My trewe lordes, my trewe burgeis!
Line 2620
To ȝow alle it is right couthe,
How we ben in euery mannes mouthe
For the schame and vilonye,
The Mansclauȝter and the robberye,
Line 2624
That Gregeis dede sumtyme to oure.
I wolde ther-fore by consayl ȝoure
Venge vs alle, if we myght,
Off oure enemys, and that is right.
Line 2628
I thenke to sende Paris my sone,
To venge vs, if he conne.
But for I nolde noght aȝeyns ȝoure wil
Do no-thyng, and that is skyl,
Line 2632
I wol not do with-oute ȝoure assent,
And therfore afftir ȝow I sent.
Say me now ȝoure owne lykyng:
How lykes ȝow my begynnyng?'
Line 2636
Ther was a knyȝt, het Partheus,—
His fader hight Euforbius,—
He seyde: 'my lord, my dere kyng!
I am ȝoure knyght and ȝoure vndirlyng,
Line 2640
Ȝoure lordschepe to knowe and reuerence:
I hadde a fadir of gret science,
Ther was not In Europe ne in Assye
So wyse a man of Philosophye;
Line 2644
He tolde me offte—so god me spede!—
That, if Paris to Grece ȝede,
