Seuen hundrid knyȝtes gode and lele. [folio 24a]
Line 1562
He ferde as he hadde y-raued,
So fayn he wolde his brother haue saued.
Line 1564
He rod thanne al aboute
To his fomen with gret route,
And amonges hem [made] ful gret pay;
To his brother he made him way,
Line 1568
And halp him fro his foos hondes,
And felde Troyens on the sondes,
And brouȝt to Castor the Troyes stede,
And halp him vp at his gret nede.
Line 1572
POlleus kyng brende as the fyr
For gret wratthe, onde & ir [MS. hir.] ,
That he had so his brother dyght
And warisched him of his myght.
Line 1576
He saw a knyȝt agayn him—
His name was Eliachim,
The kynges sone Sartaginis,
And Lamedon Cosyn also y-wys—
Line 1580
He smot the knyȝt with al his myȝt
Ryght be-fore the kynges syȝt,
That he died be-fore his eyen
With mechel wo and mechel pyn.
Line 1584
¶ Kyng Lamedon that be-held
His cosyn dyed In the feld,
Ȝeld the gost be-fore him there,
He wepte for him ful many a tere [MS. atere.] .
Line 1588
He sette his horn to his mouthe
And blew thries, as he wel couthe;
When he hadde blowen the thridde blast,
The knyȝtes come aboute him fast,
Line 1592
Thei asked him, what him was;
Lamedon saide to hem: 'alas!
Se ȝe not my cosyn dere
