But kepte the toun so al aboute [folio 235b]
Line 15945
For ferd of hem that were with-oute.
Two Monethes the ȝates were stoken
That thei were neuere vnloken,
Line 15948
Vntil a quene gentil & ffre
Come hem to helpe fro fer contre.
The quene was called Pantasaley,
A noble womman of Chyualry,
Line 15952
Sche was quene of Amazone;
For hir was furst the ȝates vndone:
Sche come thedir with a thousande
Off hardi maydenes wel fyghtande,
Line 15956
To helpe Troyens, tho hir was tolde
That the Gryffons proude & bolde
With mechel ffolk & gret aray
Aboute the toun of Troye lay
Line 15960
And seged hem that were with-Inne,
To scle the kyng, the toun to wynne.
BVt herkenes now of the quene,
And of hir maydenes bolde & kene!
Line 15964
I wol ȝow telle, if ȝe wol here,
Off here lond the right manere;
Where it is, and what lande,
The manere schal ȝe vndirstande.
Line 15968
And elles wol ȝe haue meruayle—
That wommen scholde go to batayle,
Armed as men vpon her stedes,
And be so doghti In her dedes.
Line 15972
IN the est-ende of alle the world— [¶ De Insula Amazone [On the left side in MS.] .]
As I In bokes haue I-herd—
Is a lond, a louely Ilde,
That wymmen dwelle In, wonder wilde,
Line 15976
Off grete renoun and prowesse,
That Amazone y-called is;
